Иовъ

Главы: 1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27 28 29 30
31 32 33 34 35 36 37 38 39 40
41 42

Глава 1.
1 Человек некий бяше во стране авситидийстей, емуже имя иов, и бе человек он истинен, непорочен, праведн, богочестив, удаляяся от всякия лукавыя вещи.
2 Быша же ему сынове седмь и дщери три.
3 И бяху скоти его, овец седмь тысящ, велблюдовъ три тысящи, супруг волов пять сот, и ослиц пасомыхъ пять сот, и слуг много зело, и дела велия бяху ему на земли: и бе человек оный благороднейший сущих от восток солнца.
4 Сходящеся же сынове его друг ко другу, творяху пиръ на кийждо день, споемлюще вкупе и три сестры своя, ясти и пити с ними.
5 И егда скончавашеся дние пира, посылаше иов и очищаше их, востая заутра, и приношаше о них жертвы по числу их, и телца единаго о гресе о душахъ их. глаголаше бо иов: негли когда сынове мои согрешиша и в мысли своей злая помыслиша противу бога? тако убо творяше иов вся дни.
6 И бысть яко день сей, и се, приидоша ангели божии предстати пред господем, и диавол прииде с ними.
7 И рече господь диаволу: откуду пришел еси? и отвещавъ диавол господеви, рече: обшед землю и прошед поднебесную, се, есмь.
8 И рече ему господь: внял ли еси мыслию твоею на раба моего иова? зане несть яко он на земли: человек непорочен, истинен, богочестив, удаляяся от всякия лукавыя вещи.
9 отвеща же диавол и рече пред господем:
10 еда туне иов чтит господа? не ты ли оградил еси внешняя его и внутренняя дому его, и яже вне всех сущих его окрестъ? дела же руку его благословилъ еси и скоты его многи сотворил еси на земли:
11 но посли руку твою и коснися всех, яже имать, аще не в лице тя благословит,
12 Тогда рече господь диаволу: се, вся, елика суть ему, даю в руку твою, но самого да не коснешися. и изыде диавол от господа.
13 И бысть яко день сей, сынове иовлевы и дщери его пияху вино в дому брата своего старейшаго.
14 И се, вестник прииде ко иову и рече ему: супрузи волов оряху, и ослицы пасяхуся близ их:
15 и пришедше пленителие плениша их и отроки избиша мечем, и спасохся аз един и приидох возвестити тебе.
16 Еще сему глаголющу, прииде ин вестник и рече ко иову: огнь спаде с небесе и пожже овцы и пастыри пояде подобне, спасохся же аз единъ и приидох возвестити тебе.
17 Еще сему глаголющу, прииде ин вестник и рече ко иову: конницы сотвориша началства три и окружиша велблюды и плениша их и отроки избиша мечьми, спасохся же аз един и приидох возвестити тебе.
18 Еще сему глаголющу, ин вестник прииде, глаголя иову: сыном твоим и дщерем твоим ядущим и пиющимъ у брата своего старейшаго,
19 внезапу ветр велик найде от пустыни и коснуся четыремъ углом храмины, и паде храмина на дети твоя, и скончашася: спасохся же аз един и приидох возвестити тебе.
20 Тако (услышавъ) иов, востав растерза ризы своя и остриже власы главы своея, (и посыпа перстию главу свою,) и пад на землю, поклонися (господеви)
21 и рече: сам наг изыдох от чрева матере моея, наг и отиду тамо: господь даде, господь отят: яко господеви изволися, тако бысть: буди имя господне благословено (во веки).
22 Во всех сих приключившихся ему ничтоже согреши иов пред господем, (ниже устнама своима,) и не даде безумия богу.

Глава 2.
1 Бысть же яко день сей, и приидоша ангели божии предстати пред господем, и диавол прииде посреде ихъ предстати пред господем.
2 И рече господь диаволу: откуду ты грядеши? тогда рече диавол пред господем: прошед поднебесную и обшед всю землю, приидох.
3 И рече господь ко диаволу: внял ли еси убо (мыслию твоею) рабу моему иову? яко несть такова от сущихъ на земли: человек незлобив, истинен, непорочен, богочестив, удаляяся от всякаго зла, еще же придержится незлобия: ты же рекл еси имения его погубити вотще.
4 отвещав же диавол господеви, рече: кожу за кожу, и вся, елика имать человек, даст за душу свою:
5 обаче посли руку твою и коснися костем его и плоти его, аще не в лице тя благословит.
6 Рече же господь диаволу: се, предаю ти его, токмо душу его соблюди.
7 Изыде же диавол от лица господня и порази иова гноемъ лютым от ногу даже до главы.
8 И взя (иовъ) чреп, да острогает гной свой, и той седяше на гноищи вне града.
9 Времени же многу минувшу, рече к нему жена его: доколе терпиши глаголя: се, пожду время еще мало, чая надежди спасения моего? се бо, потребися от земли память твоя, сынове твои и дщери, моего чрева болезни и труды, имиже вотще трудихся с болезньми: ты же сам в гнои червей седиши, обнощевая вне без покрова, и аз скитающися и служащи, место от места преходящи, и дом от дому, ожидающи солнца, когда зайдет, да почию от трудов моих и от болезней, яже мя ныне обдержат: но рцы глагол некий ко господу и умри.
10 он же воззрев рече к ней: вскую яко едина от безумных жен возглаголала еси? аще благая прияхомъ от руки господни, злых ли не стерпимъ? во всех сих приключившихся ему, ничимже согреши иов устнама пред богомъ (и не даде безумия богу).
11 услышавше же трие друзие его вся злая нашедшая нань, приидоша кийждо от своея страны к нему: елифазъ феманский царь, валдад савхейский властитель, софар минейский царь: и приидоша к нему единодушно утешити и посетити его.
12 увидевше же его издалеча, не познаша, и возопивше гласом велиим восплакашася, растерзавше кийждо одежду свою и посыпавше перстию главы своя:
13 седеша при нем седмь дний и седмь нощей, и никтоже от них возглагола к нему словесе: видяху бо язву люту сущу и велику зело.

Глава 3.
1 Посем отверзе иов уста своя и прокля день свой,
2 глаголя:
3 да погибнет день, в оньже родихся, и нощь оная, в нюже реша: се, мужеск пол:
4 та нощь буди тма, и да не взыщет ея господь свыше, ниже да приидет на ню свет,
5 и да приимет ю тма и сень смертная, да приидетъ на ню сумрак: проклят буди день той
6 и нощь оная: да постигнет ю тма, да не будет во днех лета, ниже да вчислится во днех месяцей:
7 но нощь оная да будет болезнь, и да не приидетъ на ню веселие и радость,
8 но да прокленет ю проклинаяй той день, иже имать одолети великаго кита:
9 да померкнут звезды тоя нощи, да ожидает и на светъ да не приидет, и да не видит денницы возсиявающия,
10 яко не затвори врат чрева матере моея: отяла бо бы болезнь от очию моею:
11 почто бо во утробе не умрохъ? из чрева же изшед, и абие не погибохъ?
12 почто же мя прияша на колена? почто же ссах сосца?
13 ныне убо уснув умолчал бых, уснувъ же почил быхъ
14 со царьми и советники земли, иже хваляхуся оружии,
15 или со князи, имже много злата, иже наполниша домы своя сребра,
16 или якоже изверг излазяй из ложесн матерних, или якоже младенцы, иже не видеша света:
17 тамо нечестивии утолиша ярость гнева, тамо почиша претружденнии телом,
18 вкупе же в веце сем бывшии не слышат гласа собирающаго дань:
19 мал и велик тамо есть, и раб не бояйся господина своего:
20 почто бо дан есть сущим в горести свет и сущимъ в болезнех душам живот,
21 иже желают смерти и не получают, ищуще якоже сокровища,
22 обрадовани же бывают, аще улучат (смерть)?
23 смерть бо мужу покой, егоже путь сокровен есть, затвори бо бог окрест его:
24 прежде бо брашен моих воздыхание ми приходит, слезю же аз одержимь страхом,
25 страх бо, егоже ужасахся, прииде ми, и егоже бояхся, срете мя:
26 ни умирихся, ниже умолчах, ниже почих, и найде ми гнев.

Глава 4.
1 отвеща же елифаз феманитин, глаголя:
2 еда множицею глаголано ти бысть в труде? тяжести же глагол твоих кто стерпитъ?
3 аще бо ты научил еси многи и руце немощных утешилъ еси,
4 немощныя же воздвигл еси словесы, коленом же немощнымъ силу обложил еси.
5 ныне же прииде на тя болезнь и коснуся тебе, ты же возмутился еси.
6 Еда страх твой есть не в безумии, и надежда твоя и злоба пути твоего?
7 Помяни убо, кто чист сый погибе? или когда истиннии вси из корене погибоша?
8 якоже видех орющих неподобная, сеющии же я болезни пожнут себе,
9 от повеления господня погибнут, от духа же гнева его изчезнут.
10 Сила львова, глас же львицы, веселие же змиев угасе:
11 мраволев погибе, занеже не имеяше брашна, скимни же львовы оставиша друг другу.
12 Аще же глагол кий истинен бе во словесех твоих, ни коеже бы от сих тя сретило зло. не приимет ли ухо мое предивных от него?
13 Страхом же и гласом нощным, нападающь страх на человеки,
14 ужас же мя срете и трепет, и зело кости моя стрясе:
15 и дух на лице ми найде: устрашишася же ми власи и плоти,
16 востах и не разумех, видех, и не бе обличия пред очима моима, но токмо дух тих и глас слышах:
17 что бо? еда чист будет человек пред богомъ? или в делех своих без порока мужъ?
18 аще рабом своим не верует, и во ангелех своихъ стропотно что усмотре,
19 живущих же в бренных храминах, от нихже и мы сами от тогожде брения есмы, порази, якоже молие,
20 и от утра даже до вечера ктому не суть: занеже не могоша себе помощи, погибоша:
21 дхну бо на ня, и изсхоша, и понеже не имеяху премудрости, погибоша.

Глава 5.
1 Призови же, аще кто тя услышит, или аще кого от святых ангел узриши.
2 Безумнаго бо убивает гнев, заблуждшаго же умерщвляетъ рвение.
3 Аз же видех безумных укореняющихся, но абие поядено бысть их жилище.
4 Далече да будут сынове их от спасения, и да сотрутся при дверех хуждших, и не будет изымаяй.
5 яже бо они собраша, праведницы поядят, сами же от зол не изъяти будут: изможденна буди крепость их.
6 Не имать бо от земли изыти труд, ни от гор прозябнути болезнь:
7 но человек раждается на труд, птенцы же суповы высоко парят.
8 обаче же аз помолюся богови, господа же всех владыку призову,
9 творящаго велия и неизследимая, славная же и изрядная, имже несть числа:
10 дающаго дождь на землю, посылающаго воду на поднебесную:
11 возносящаго смиренныя на высоту и погибшия воздвизающаго во спасение:
12 расточающаго советы лукавых, да не сотворят руце их истины.
13 уловляяй премудрых в мудрости их, совет же коварных разори.
14 Во дни обымет их тма, в полудне же да осяжутъ якоже в нощи,
15 и да погибнут на брани: немощный же да изыдет изъ руки сильнаго.
16 Буди же немощному надежда, неправеднаго же уста да заградятся.
17 Блажен же человек, егоже обличи бог, наказания же вседержителева не отвращайся:
18 той бо болети творит и паки возставляет: порази, и руце его изцелят:
19 шестижды от бед измет тя, в седмем же не коснеттися зло:
20 во гладе избавит тя от смерти, на брани же изъ руки железа изрешит тя:
21 от бича языка скрыет тя, и не убоишися от золъ находящих:
22 неправедным и беззаконным посмеешися, от дивиихъ же зверей не убоишися,
23 зане с камением дивиим завет твой: зверие бо дивии примирятся тебе.
24 Потом уразумееши, яко в мире будет дом твой, жилище же храмины твоея не имать согрешити:
25 уразумееши же, яко много семя твое, и чада твоя будут яко весь злак селный:
26 внидеши же во гроб якоже пшеница созрелая во время пожатая, или якоже стог гумна во время свезенный.
27 Се, сия сице изследихом: сия суть, яже слышахом: ты же разумей себе, аще что сотворил еси.

Глава 6.
1 отвещав же иов, рече:
2 аще бы кто веся извесил гнев мой, болезни же моя взял бы на мерило вкупе,
3 то песка морскаго тяжчайшии были бы: но, якоже мнится, словеса моя зла суть.
4 Стрелы бо господни в теле моем суть, ихже ярость испивает кровь мою: егда начну глаголати, бодутъ мя.
5 Что бо? еда вотще возревет дивий осел, разве брашна прося? или возревет гласом вол, в яслехъ имеяй брашно?
6 Снестся ли хлеб без соли? или есть вкус во тщих словесехъ?
7 Не может бо утишитися душа моя: смрад бо зрю брашна моя, якоже воню львову.
8 Аще бо дал бы, да приидет прошение мое, и надежду мою дал бы господь.
9 Начен господь да уязвляет мя, до конца же да не убиетъ мя.
10 Буди же ми град гроб, на егоже стенах скакахъ в нем: не пощажу: не солгах бо во словесех святых бога моего.
11 Кая бо крепость моя, яко терплю? или кое ми время, яко терпит моя душа?
12 еда крепость камения крепость моя? или плоти моя суть медяны?
13 или не уповах на него? помощь же от мене отступи,
14 отречеся от мене милость, посещение же господне презре мя.
15 Не воззреша на мя ближнии мои: якоже поток оскудеваяй, или якоже волны преидоша мя:
16 иже мене бояхуся, ныне нападоша на мя:
17 якоже снег или лед смерзлый, егда истаетъ теплоте бывшей, не ктому познавается, что бе:
18 тако и аз оставлен есмь от всех, погибохъ же и бездомок бых:
19 видите пути феманския, на стези савонския смотрящии,
20 и студа исполнени будут на грады и на имения надеющиися.
21 ныне же и вы наидосте на мя немилостивно: убо видевше мой струп убойтеся.
22 Что бо? еда что у вас просих, или вашея крепости требую,
23 да спасете мя от врагов, или из руки сильныхъ избавите мя?
24 Научите мя, аз же умолчу: аще что погреших, скажите ми.
25 Но, якоже мнится, зла (суть) мужа истиннаго словеса, не от вас бо крепости прошу:
26 ниже обличение ваше словесы мя утолит, ниже бо вещания вашего словес стерплю.
27 обаче яко на сира нападаете, наскачете же на друга вашего.
28 ныне же воззрев на лица ваша, не солжу.
29 Сядите ныне, и да не будет неправедно, и паки ко праведному снидитеся.
30 Ибо несть в языце моем неправды, и гортань мойне разуму ли поучается?

Глава 7.
1 Не искушение ли житие человеку на земли, и якоже наемника повседневнаго жизнь его?
2 или якоже раб бояйся господа своего и улучивъ сень? или якоже наемник ждый мзды своея?
3 такожде и аз ждах месяцы тщи, нощи же болезней даны ми суть.
4 Аще усну, глаголю: когда день? егда же востану, паки: когда вечеръ? исполнен же бываю болезней от вечера до утра.
5 Месится же мое тело в гнои червей, обливаю же грудие земли, гной стружа.
6 Житие же мое есть скоряе беседы, погибе же во тщей надежди.
7 Помяни убо, яко дух мой живот, и ктому не возвратится око мое видети благая.
8 Не узрит мене око видящаго мя: очи твои на мне, и ктому несмь,
9 якоже облак очищен от небесе: аще бо человекъ снидет во ад, ктому не взыдет,
10 ни возвратится во свой дом, ниже имать его познати ктому место его.
11 убо ниже аз пощажу уст моих, возглаголю в нужди сый, отверзу уста моя горестию души моея сотеснен.
12 Еда море есмь, или змий, яко учинил еси на мя хранение?
13 Рекох, яко утешит мя одр мой, произнесу же ко мне на едине слово на ложи моем:
14 устрашаеши мя сониями и видениями ужасаеши мя:
15 свободиши от духа моего душу мою, от смерти же кости моя.
16 Не поживу бо во век, да долготерплю: отступи от мене, тще бо житие мое.
17 Что бо есть человек, яко возвеличил еси его? или яко внимаеши умом к нему?
18 или посещение твориши ему по всяко утро и в покои судити его имаши?
19 Доколе не оставиши мене, ниже отпускаеши мя, дондеже поглощу слины моя в болезни?
20 Аще аз согреших, что тебе возмогу соделати, сведый ум человечь? почто мя еси положил прекословна тебе, и есмь тебе бременемъ?
21 почто неси сотворил беззаконию моему забвения, и очищения греха моего? ныне же в землю отиду, утренюяй же несмь ктому.

Глава 8.
1 отвещав же валдад савхейский, рече: доколе глаголати будеши сия?
2 дух многоглаголив во устех твоих.
3 Еда господь обидит судяй? или вся сотворивый возмятетъ правду?
4 Аще сынове твои согрешиша пред ним, посла руку на беззакония их:
5 ты же утренюй ко господу вседержителю моляся:
6 аще чист еси и истинен, молитву твою услышит, устроит же ти паки житие правды:
7 будут убо первая твоя мала, последняя же твоя без числа.
8 Вопроси бо рода перваго, изследи же по роду отцев:
9 вчерашни бо есмы и не вемы, сень бо есть наше житие на земли:
10 не сии ли научат тя и возвестят ти и от сердца изнесут словеса?
11 Еда произничет рогоз без воды, или растет ситникъ без напаяния?
12 еще сущу на корени, и не пожнется ли? прежде напаяния всякое былие не изсыхает ли?
13 тако убо будут последняя всех забывающих господа: надежда бо нечестиваго погибнет:
14 не населен бо будет дом его, паучина же сбудется селение его.
15 Аще подпрет храмину свою, не станет: емшуся же ему за ню, не пребудет.
16 Влажный бо есть под солнцем, и от тления его леторасль его изыдет:
17 на собрании камения спит, посреде же кремения поживет:
18 аще поглотит место, солжет ему, не видел еси таковая,
19 яко превращение нечестиваго таково, из земли же инаго произрастит.
20 господь бо не отринет незлобиваго: всякаго же дара от нечестиваго не приимет.
21 Истинным же уста исполнит смеха, устне же их исповедания.
22 Врази же их облекутся в студ: жилище же нечестиваго не будет.

Глава 9.
1 отвещав же иов, рече:
2 воистинну вем, яко тако есть: како бо будетъ праведен человек у господа?
3 аще бо восхощет судитися с ним, не послушает его, да не преречет ко единому словеси его от тысящи.
4 Премудр бо есть мыслию, крепок же и велик: кто жесток быв противу его, пребысть?
5 обетшаяй горы, и не ведят, превращаяй я гневом:
6 трясый поднебесную из оснований, столпи же ея колеблются:
7 глаголяй солнцу, и не восходит, звезды же печатствует:
8 прострый един небо и ходяй но морю, яко по земли:
9 творяй плиады и еспера, и арктура и сокровища южная:
10 творяй велия и неизследованная, славная же и изрядная, имже несть числа.
11 Аще приидет ко мне, не имам видети: и аще мимоидетъ мене, никако уразумех.
12 Аще возмет, кто возвратитъ? или кто речет ему: что сотворил еси?
13 Сам бо отвращает гнев, слякошася под ним кити поднебеснии.
14 Аще же мя услышит, или разсудит глаголы моя?
15 Аще бо и праведен буду, не услышит мене, суду его помолюся:
16 аще же воззову, и услышит мя, не иму веры, яко услыша глас мой.
17 Да не мглою мя потребит, многа же ми сотрения сотвори всуе,
18 не оставляет бо мя отдохнути, исполни же мя горести.
19 Понеже силен есть крепостию: кто убо суду его воспротивится?
20 Аще бо буду праведен, уста моя нечестия сотворят: аще же буду непорочен, стропотен буду.
21 Аще бо нечестие сотворих, не вем душею моею: обаче отемлется ми живот.
22 Темже рех: велика и сильна губит гнев.
23 яко лукавии смертию лютою погибнут, обаче праведнымъ посмеваются.
24 Предана есть земля в руце нечестиваго, лица судий ея покрывает: аще же не сам есть, кто есть?
25 Житие же мое есть легчае скоротечца: отбегоша и не видеша.
26 Или есть кораблем след пути, или орла летяща, ищуща яди?
27 Аще бо реку: забуду глаголя, приникнув лицем воздохну,
28 трясуся всеми удесы: вем бо, яко не безвинна мя оставиши.
29 Аще же нечестив есмь, почто не умрохъ?
30 Аще бо измыюся снегом и очищуся руками чистыми,
31 доволно во скверне омочил мя еси, возгнушася же мною одежда моя.
32 Неси бо человек, якоже аз, емуже противопрюся, да приидем вкупе на суд.
33 о, дабы ходатай нам был, и обличаяй и разслушаяй между обема.
34 Да отимет от мене жезл, страх же его да не смущает мене:
35 и не убоюся, но возглаголю, ибо тако не вем самъ себе.

Глава 10.
1 Труждаюся душею моею, стеня испущу на мя глаголы моя, возглаголю горестию души моея одержимь
2 и реку ко господеви: не учи мя нечествовати, и почто ми сице судил еси?
3 или добро ти есть, аще вознеправдую, яко презрелъ еси дела руку твоею, совету же нечестивых внялъ еси?
4 или якоже человек видит, видиши? или якоже зрит человек, узриши?
5 или житие твое человеческо есть? или лета твоя яко дние мужа?
6 яко истязал еси беззаконие мое и грехи моя изследил еси.
7 Веси бо, яко не нечествовах: но кто есть изымаяй из руку твоею?
8 Руце твои сотвористе мя и создасте мя: потом же преложив, поразил мя еси.
9 Помяни, яко брение мя создал еси, в землю же паки возвращаеши мя.
10 Или не якоже млеко измелзил мя еси, усырилъ же мя еси равно сыру?
11 Кожею же и плотию мя облекл еси, костьми же и жилами сшил мя еси:
12 живот же и милость положил еси у мене, посещение же твое сохрани мой дух.
13 Сия имеяй в тебе, вем, яко вся можеши, и невозможно тебе ничтоже.
14 Аще бо согрешу, храниши мя, от беззакония же не безвинна мя сотворил еси.
15 Аще бо нечестив буду, люте мне, аще же буду праведен, не могу возникнути: исполнен бо есмь безчестия,
16 ловимь бо есмь аки лев на убиение: паки же преложив, люте убиваеши мя.
17 обновляяй на мя испытание мое, гнева бо великаго на мя употребил еси и навел еси на мя искушения.
18 Почто убо мя из чрева извел еси, и не умрох, око же мене не видело бы,
19 и бых бы аки не былъ? почто убо из чрева во гроб не снидохъ?
20 или не мало есть время жизни моея? остави мене почити мало,
21 прежде даже отиду, отнюдуже не возвращуся, в землю темну и мрачну,
22 в землю тмы вечныя, идеже несть света, ниже видети живота человеческаго.

Глава 11.
1 отвещав же софар минейский, рече:
2 глаголяй много, и противоуслышит: или многоречивъ мнится быти праведенъ? благословен рожденный от жены малолетен.
3 Не мног во словесех буди: несть бо противовещаяй ти.
4 Не глаголи бо, яко чист есмь делы и безпороченъ пред ним:
5 но како господь возглаголет к тебе и отверзет устне свои с тобою?
6 Потом возвестит ти силу премудрости, яко сугубъ будет в сих, яже противу тебе: и тогда уразумееши, яко достойная тебе сбышася от господа, имиже согрешилъ еси,
7 Или след господень обрящеши? или в последняя достиглъ еси, яже сотвори вседержитель?
8 Высоко небо, и что сотвориши? глубочае же сущих во аде что веси?
9 не должае ли меры земныя, или широты морския?
10 Аще же превратит вся, кто речет ему: что сотворилъ еси?
11 Той бо весть дела беззаконных: видев же нелепая, не презрит.
12 Человек же инако обилует словесы: земный же рожденный от жены равен ослу пустынному.
13 Аще бо ты чисто положил еси сердце твое, воздеваеши же руце твои к нему,
14 аще беззаконно что есть в руку твоею, далече сотвори е от тебе, неправда же в жилищи твоем да не вселится:
15 тако бо ти возсияет лице, якоже вода чиста: совлечешися же скверны, и не убоишися,
16 и труда забудеши, якоже волны мимошедшия, и не устрашишися.
17 Молитва же твоя, аки денница, и паче полудне возсияетъ ти жизнь:
18 уповая же будеши, яко будет ти надежда: от туги же и попечения явится ти мир:
19 упокоишися бо, и не будет боряй тя: пременяющиися же мнози имут просити тя,
20 спасение же оставит их: надежда бо их пагуба, очи же нечестивых истают.

Глава 12.
1 отвещав же иов, рече:
2 убо вы ли едини есте человецы, или с вами скончается премудрость?
3 И у мене сердце есть якоже и у вас.
4 Праведен бо муж и непорочен бысть в поругание:
5 во время бо определеное уготован бысть пасти от иных, домы же его опустошены быти беззаконными. обаче никтоже да уповает, лукав сый, неповиненъ быти,
6 елицы разгневляют господа, аки и истязания имъ не будет.
7 Но вопроси четвероногих, аще ти рекут, и птиц небесных, аще ти возвестят:
8 повеждь земли, аще ти скажет, и исповедят ти рыбы морския.
9 Кто убо не разуме во всех сих, яко рука господня сотвори сия?
10 Не в руце ли его душа всех живущих и дух всякаго человека?
11 ухо бо словеса разсуждает, гортань же брашна вкушает.
12 Во мнозем времени премудрость, во мнозе же житии ведение.
13 у него премудрость и сила, у того совет и разум.
14 Аще низложит, кто созиждетъ? аще затворит от человеков, кто отверзетъ?
15 Аще возбранит воду, изсушит землю: аще же пустит, погубит ю превратив.
16 у него держава и крепость, у того ведение и разум.
17 Проводяй советники пленены, судии же земли ужаси:
18 посаждаяй цари на престолех и обвязуяй поясом чресла их:
19 отпущаяй жерцы пленники, сильных же земли низврати:
20 изменяяй устне верных, разум же старцевъ уразуме:
21 изливаяй безчестие на князи, смиренныя же изцели:
22 открываяй глубокая от тмы, изведе же на свет сень смертную:
23 прельщаяй языки и погубляяй их, низлагаяй языки и наставляяй их:
24 изменяяй сердца князей земных, прельсти же их на пути, егоже не ведяху,
25 да осяжут тму, а не свет, да заблудят же яко пияный.

Глава 13.
1 Се, сия виде око мое, и слыша ухо мое,
2 и вем, елика и вы весте: и не неразумнее есмь вас.
3 Но обаче и аз ко господу возглаголю, обличу же предъ ним, аще восхощет.
4 Вы бо есте врачеве неправеднии и целителе злыхъ вси,
5 буди же вам онемети, и сбудется вам в премудрость.
6 Слышите же обличение уст моих, суду же устенъ моих вонмите.
7 Не пред богом ли глаголете и пред ним вещаете лесть?
8 или уклонитеся, вы же сами судии будите.
9 Добро бо, аще изследит вас: аще бо вси творящии приложитеся к нему, обаче обличит вы.
10 Аще же и тай лицам удивитеся,
11 не движение ли его смятет вас, боязнь же от него нападет на вы?
12 отидет же величание ваше равно пепелу, тело же бренно.
13 умолчите, да возглаголю и почию от гнева.
14 Вземля плоти моя зубами, душу же мою положу в руце моей.
15 Аще мя убиет сильный, понеже и нача, обаче возглаголю и обличу пред ним:
16 и сие ми сбудется во спасение: не внидет бо предъ ним лесть.
17 Послушайте, послушайте глагол моих: возвещу бо вамъ слышащим.
18 Се, аз близ есмь суда моего, вем аз, яко праведен явлюся.
19 Кто бо есть судяйся со мною, да ныне умолчу и изчезну?
20 Двое же ми сотвориши, тогда от лица твоего не скрыюся:
21 руку от мене отими, страх же твой да не ужасаетъ мя:
22 посем призовеши, аз же тя послушаю, или возглаголеши, аз же ти дам ответ.
23 Колицы суть греси мои и беззакония моя? научи мя, кая суть?
24 Почто крыешися от мене? мниши же мя противна суща тебе?
25 Или яко лист движимь ветром убоишися? или яко сену носиму ветром противляешимися?
26 яко написал еси на мя злая, обложил же ми еси юностныя грехи:
27 положил же еси ногу мою в возбранение: сохранилъ же еси дела моя вся: в корения же ног моих пришелъ еси:
28 иже обетшают якоже мех, или якоже риза молиемъ изъядена.

Глава 14.
1 Человек бо рожден от жены малолетен и исполнь гнева:
2 или якоже цвет процветый отпаде, отбеже же яко сень, и не постоит.
3 Не и о сем ли слово сотворил еси, и сему сотворилъ еси внити на суд пред тя?
4 Кто бо чист будет от скверны? никтоже,
5 аще и един день житие его на земли: изочтени же месяцы его от тебе, на время положил еси, и не преступит.
6 отступи от него, да умолкнет и изберет житие якоже наемник.
7 Есть бо древу надежда: аще бо посечено будет, паки процветет, и леторасль его не оскудеет:
8 аще бо состареется в земли корень его, на камени же скончается стебло его,
9 от вони воды процветет, сотворит же жатву, якоже новосажденное.
10 Муж же умерый отиде, пад же человек, ктому несть.
11 Временем бо оскудевает море, река же опустевши изсше:
12 человек же уснув не востанет, дондеже не будетъ небо сошвено, и не возбудятся от сна своего.
13 убо, о, дабы во аде мя сохранил еси, скрылъ же мя бы еси, дондеже престанет гнев твой, и вчиниши ми время, в неже память сотвориши ми.
14 Аще бо умрет человек, жив будет: скончавъ дни жития своего, потерплю, дондеже паки буду.
15 Посем воззовеши, аз же послушаю тя: дел же руку твоею не отвращайся:
16 изчислил же еси начинания моя, и ничтоже тя мимоидетъ от грех моих:
17 запечатлел же ми еси беззакония в мешце, назнаменалъ же еси, аще что неволею преступих.
18 обаче и гора падающи распадется, и камень обетшаетъ от места своего:
19 камение огладиша воды, и потопиша воды взнак холмы земныя, и ожидание человеческо погубил еси.
20 отринул еси его до конца, и отиде: изменилъ еси ему лице и испустил еси.
21 Многим же бывшим сыном его, не весть: аще же и мало их будет, не знает:
22 но плоти его болеша, душа же его о себе сетова.

Глава 15.
1 отвещав же елифаз феманитин, рече:
2 еда премудрый даст ответ разумен на ветр, и наполни болезнию чрево,
3 обличая глаголы, имиже не подобает, и словесы, ихже ни кая польза?
4 Не и ты ли отринул еси страхъ? скончал же еси глаголы таковы пред господемъ?
5 Повинен еси глаголом уст твоих, ниже разсудилъ еси глаголы сильных.
6 Да обличат тя уста твоя, а не аз, и устне твои на тя возсвидетелствуют.
7 Что бо? еда первый от человек рожден еси? или прежде холмов сгустился еси?
8 или строение господне слышал еси? или в советника тя употреби богъ? и на тя (единаго) ли прииде премудрость?
9 что бо веси, егоже не вемы? или что разумееши ты, егоже и мы (не разумеемъ)?
10 И стар и древен есть в нас, старший отца твоего деньми.
11 Мало, о нихже согрешил еси, уязвлен еси, вельми выше меры возглаголал еси.
12 Что дерзостно бысть сердце твое? или что вознесостеся очи твои?
13 яко ярость изрыгнул еси пред господем, изнеслъ же еси изо уст такова словеса?
14 Кто бо сый человек яко будет непороченъ? или аки будущий праведник рожден от жены?
15 Аще во святых не верит, небо же нечисто пред ним,
16 кольми паче мерзкий и нечистый муж, пияй неправды, якоже питие.
17 Возвещу же ти, послушай мене: яже ныне видех, возвещу ти,
18 яже премудрии рекут, и не утаиша отцы их,
19 имже единым дана бысть земля, и не найде иноплеменникъ на ня.
20 Все житие нечестиваго в попечении, лета же изочтена дана сильному,
21 страх же его во ушесех его: егда мнитъ уже в мире быти, тогда приидет нань низвращение:
22 да не верует отвратитися от тмы, осужден бо уже в руки железа,
23 учинен же есть в брашно неясытем: весть же в себе, яко ждет падения, день же темен превратитъ его,
24 беда же и скорбь обымет его, якоже военачалникъ напреди стояй падает,
25 яко вознесе руце на господа, пред господем же вседержителемъ ожесточи выю,
26 тече же противу ему укоризною в толщи хребта щита своего:
27 яко покры лице свое туком своим и сотвори омет на стегнах: (хвала же его укоризна).
28 Да вселится же во градех пустых, внидет же в домы ненаселенныя: а яже они уготоваша, инии отнесут.
29 Ниже обогатится, ниже останет имение его, не имать положити на землю сени,
30 ниже избежит тмы: прозябение его да усушитъ ветр, и да отпадет цвет его:
31 да не верит, яко стерпит, тщетная бо сбудутся ему.
32 Посечение его прежде часа растлеет, и леторасль его не облиственеет:
33 да обыман будет якоже недозрелая ягода прежде часа, да отпадет же яко цвет масличия.
34 Послушество бо нечестиваго смерть, огнь же пожжетъ домы мздоимцев:
35 во чреве же приимет болезни, сбудется же ему тщета,чрево же его понесет лесть.

Глава 16.
1 отвещав же иов, рече:
2 слышах сицевая многа, утешителие зол вси.
3 Что бо? еда чин есть во словесех ветра? или кую ти пакость сотворит, яко отвещаеши?
4 И аз якоже вы возглаголю: аще бы душа ваша подлежала вместо моея, тогда наскочил бых на вы словесы, покиваю же на вы главою моею.
5 Буди же крепость во устех моих, движения же устенъ не пощажу.
6 Аще бо возглаголю, не возболю ли язвою? аще же и умолчу, чим менше уязвен буду?
7 ныне же преутруждена мя сотвори, буя, согнивша, и ятъ мя.
8 В послушество бых, и воста во мне лжа моя, противно лицу моему отвеща.
9 Гневен быв низложи мя, возскрежета зубы на мя, стрелы разбойников его нападоша на мя.
10 остротою очес наскака, мечем порази мя в колена: вкупе же потекоша на мя:
11 предаде бо мя господь в руки неправедных, нечестивымъ же поверже мя.
12 Мирствующа разсыпа мя, взяв мя за власы оборва, постави мя аки примету.
13 обыдоша мя копиями бодуще во истесы моя, не щадяще: излияша на землю желчь мою,
14 низложиша мя труп на труп, текоша ко мне могущии,
15 вретище сошиша на кожу мою, и мощь моя на земли угасе.
16 Чрево мое сгоре от плача, на веждах же моих стень смертная,
17 неправедно же ни едино бе в руку моею: молитва же моя чиста.
18 Земле, да не покрыеши над кровию плоти моея, ниже да будет место воплю моему.
19 И ныне се, на небесех послух мой, свидетель же ми во вышних.
20 Да приидет моя мольба ко господу, пред нимже да каплетъ око мое.
21 Буди же обличение мужу пред господем, и сыну человеческому ко ближнему его.
22 Лета же изочтеная приидоша, и путем, имже не возвращуся, пойду.

Глава 17.
1 Тлею духом носимь, прошу же гроба и не улучаю.
2 Молю болезнуя, и что сотворю? украдоша же ми имение чуждии.
3 Кто есть сей? рукою моею связан да будет.
4 яко сердце их сокрыл еси от мудрости, сего ради да не вознесеши их.
5 Части возвестит злобы: очи же на сынех истаяста.
6 Положил же мя еси в притчу во языцех, смехъ же бых им.
7 ослепоста бо от гнева очи мои, повоеван быхъ вельми от всех:
8 чудо объя истинных о сем, праведник же на беззаконника да востанет:
9 да содержит же верный путь свой, чистый же рукама да приимет дерзость.
10 Но обаче вси належите и приидите, не бо обретаю в вас истины.
11 Дние мои преидоша в течении, расторгошася же удове сердца моего.
12 Нощь в день преложих: свет близ от лица тмы.
13 Аще бо стерплю, ад ми есть дом, в сумраце же постлася ми постеля.
14 Смерть назвах отца моего быти, матерь же и сестру ми гной.
15 Где убо еще есть ми надежда, или благая моя узрю?
16 или со мною во ад снидут, или вкупе в персть снидем.

Глава 18.
1 отвещав же валдад савхейский, рече:
2 доколе не престанеши? пожди, да и мы возглаголем.
3 И почто аки четвероножная умолчахом пред тобою?
4 Пребысть ти гнев. что бо? аще ты умреши, не населенна ли будет поднебесная? или превратятся горы из оснований?
5 И свет нечестивых угаснет, и не произыдет ихъ пламень:
6 свет его тма в жилищи, светилник же в нем угаснет:
7 да уловят меншии имения его, погрешит же его совет:
8 ввержена же бысть нога его в пругло, мрежею да повиется:
9 да приидут же нань пругла, укрепит нань жаждущих:
10 скрыся в земли уже его, и ятие его на стези.
11 окрест да погубят его болезни: мнози же окрестъ ног его обыдут во гладе теснем:
12 падение же ему уготовано велико.
13 Поядены же да будут плесны ног его, красная же его да пояст смерть.
14 отторжено же буди от жития его изцеление, да иметъ же его беда виною царскою.
15 Да вселится в храмине его в нощи его, посыпана да будут лепотная его жупелом:
16 под ним корения его да изсохнут, свыше же нападетъ пожатие его.
17 Память его да погибнет от земли, и (не) будетъ имя его на лицы внешнем:
18 да отринет его от света во тму:
19 не будет знаемь в людех его, ниже спасен въ поднебесней дом его:
20 но в своих ему поживут инии, над ним воздохнуша последнии, первых же объя чудо.
21 Сии суть домове неправедных, сие же место неведущихъ бога.

Глава 19.
1 отвещав же иов, рече:
2 доколе притрудну творите душу мою и низлагаете мя словесы? уразумейте токмо, яко господь сотвори мя сице.
3 Клевещете на мя, не стыдящеся мене належите ми.
4 Буди, яко воистинну аз прельстихся, и у мене водворяется погрешение, глаголати словеса, яже не подобаше, словеса же моя погрешают, и не во время:
5 буди же, яко на мя величаетеся, наскакаете же ми поношением:
6 разумейте убо, яко господь есть иже смяте мя и ограду свою на мя вознесе.
7 Се, смеюся поношению, не возглаголю: возопию, и нигдеже суд.
8 окрест огражден есмь и не могу прейти: предъ лицем моим тму положи,
9 славу же с мене совлече и отя венец от главы моея:
10 растерза мя окрест, и отидох: посече же яко древо надежду мою.
11 Люте же гнева употреби на мя и возмне мя яко врага.
12 Вкупе же приидоша искушения его на мя, на путехъ же моих обыдоша мя наветницы.
13 Братия моя отступиша от мене, познаша чуждих паче мене, и друзие мои немилостиви быша:
14 не снабдеша мя ближнии мои, и ведящии имя мое забыша мя.
15 Соседи дому и рабыни моя, (яко) иноплеменник быхъ пред ними:
16 раба моего звах, и не послуша, уста же моя моляхуся:
17 и просих жену мою, призывах же лаская сыны подложницъ моих:
18 они же мене в век отринуша, егда востану, на мя глаголют.
19 Гнушахуся мене видящии мя, и ихже любих, восташа на мя.
20 В кожи моей согниша плоти моя, кости же моя в зубехъ содержатся.
21 Помилуйте мя, помилуйте мя, о, друзие! рука бо господня коснувшаяся ми есть.
22 Почто мя гоните якоже и господь? от плотей же моихъ не насыщаетеся?
23 Кто бо дал бы, да напишутся словеса моя, и положатся оная в книзе во векъ?
24 и на дщице железне и олове, или на камениихъ изваяются?
25 Вем бо, яко присносущен есть, иже имать искупити мя,
26 (и) на земли воскресити кожу мою терпящую сия, от господа бо ми сия совершишася,
27 яже аз в себе свем, яже очи мои видеста, а не ин: вся же ми совершишася в недре.
28 Аще же и речете: что речем противу ему? и корень словесе обрящем в нем.
29 убойтеся же и вы от меча: ярость бо на беззаконныя найдет, и тогда увидят, где есть их вещество.

Глава 20.
1 отвещав же софар минейский, рече:
2 не тако мнех сия тебе рещи противу, и не разумеете паче нежели и аз.
3 Наказание срамления моего услышу, и дух от разума отвещавает ми.
4 Еда сих не уразумел еси от века, отнележе положен человек бысть на земли?
5 веселие бо нечестивых падение страшно, обрадование же беззаконных пагуба.
6 Аще взыдут на небо дары его, жертва же его облаковъ коснется:
7 егда бо мнится уже утвержден быти, тогда в конец погибнет. видевшии же его рекут: где есть?
8 якоже сон отлетевый не обрящется, отлете же аки мечтание нощное.
9 око призре, и не приложит, и ктому не познаетъ его место его.
10 Сынов его да погубят меншии, и руце его возжгутъ болезни.
11 Кости его наполнишася грехов юности его и с ним на персти уснут.
12 Аще усладится во устех его злоба, скрыетъ ю под языком своим:
13 не пощадит ея, и не оставит ея, и соберетъ ю посреде гортани своего,
14 и не возможет помощи себе: желчь аспидов во чреве его.
15 Богатство неправедно собираемо изблюется, из храмины его извлечет его ангел.
16 ярость же змиеву да ссет, да убиет же его язык змиин.
17 Да не узрит отдоения скотов, ниже прибытка меда и масла кравия.
18 Вотще и всуе трудися, богатство, от негоже не вкусит, якоже клоки не сожваемы и не поглощаемы.
19 Многих бо немощных домы сокруши, жилище же разграби и не постави.
20 Несть спасения имению его, в вожделении своемъне спасется.
21 Несть останка брашну его, сего ради не процветутъ ему благая.
22 Егда же мнит уже исполнь быти, оскорбится, всяка же беда нань приидет.
23 Аще како либо исполнит чрево свое, напустит нань ярость гнева, одождит на него болезни:
24 и не спасется от руки железа, да устрелит его лук медян,
25 и да пройдет сквозе тело его стрела: звезды же в жилищих его: да приидут нань страси,
26 и всяка тма на нем да пребудет: да пояст его огнь нераздеженый, да озлобит же пришлец дом его:
27 и да открыет небо беззакония его, и земля да востанетъ нань:
28 да извлечет дом его пагуба до конца, день гнева да приидет нань.
29 Сия часть человека нечестиваго от господа и стяжание имений его от надзирателя.

Глава 21.
1 отвещав же иов, рече:
2 послушайте, послушайте словес моих, да не будет ми от вас сие утешение:
3 потерпите ми, аз же возглаголю, таже не посмеетемися.
4 Что бо? еда человеческо ми обличение? или почто не возъярюся?
5 Воззревшии на мя удивитеся, руку положше на ланите.
6 Аще бо воспомяну, ужаснуся: обдержат бо плоть мою болезни.
7 Почто нечестивии живут, обетшаша же в богатстве?
8 Семя их по души, чада же их пред очима.
9 Домове их обилнии суть, страх же нигде, раны же от господа несть на них.
10 Говядо их не изверже: спасена же бысть их имущая во чреве и не лишися.
11 Пребывают же яко овцы вечныя, дети же их предыграют,
12 вземше псалтирь и гусли, и веселятся гласом песни.
13 Скончаша во благих житие свое, в покои же адове успоша.
14 Глаголют же господеви: отступи от нас, путий твоихъ ведети не хощем:
15 что достоин, яко да поработаем ему? и кая польза, яко да взыщем его?
16 В руках бо их бяху благая, дел же нечестивыхъ не надзирает.
17 обаче же и нечестивых светилник угаснет, найдетъ же им развращение, болезни же их обымут от гнева:
18 будут же аки плевы пред ветром, или якоже прах, егоже взя вихр.
19 Да оскудеют сыном имения его: воздаст противу ему, и уразумеет.
20 Да узрят очи его свое убиение, от господа же да не спасется.
21 яко воля его с ним в дому его, и числа месяцей его разделишася.
22 Не господь ли есть научаяй разуму и хитрости? тойже мудрых разсуждает.
23 Той умрет в силе простоты своея, всецел же благодушествуяй и благоуспеваяй,
24 утроба же его исполнена тука, мозг же его разливается.
25 ов же умирает в горести души, не ядый ничтоже блага.
26 Вкупе же на земли спят, гнилость же их покры.
27 Темже вем вас, яко дерзостию належите ми,
28 яко речете: где есть дом княжь? и где есть покров селений нечестивыхъ?
29 Вопросите мимоходящих путем, и знамения их не чужда сотворите.
30 яко на день пагубы соблюдается нечестивый, и в день гнева его отведен будет.
31 Кто возвестит пред лицем его путь его, и еже той сотвори, кто воздаст ему?
32 И той во гроб отнесен бысть, и на гробищих побде.
33 усладися ему дробное камение потока, и вследъ его всяк человек отидет, и пред ним безчисленнии.
34 Како же мя утешаете суетными? а еже бы мне почити от вас, ничтоже.

Глава 22.
1 отвещав же елифаз феманитин, рече:
2 не господь ли есть научаяй разуму и хитрости?
3 Ибо кое попечение господу, аще ты был еси делы непороченъ? или (кая) польза, яко прост творити будеши путь твой?
4 или опасение имея от тебе обличит тя и внидетъ с тобою в судъ?
5 Еда злоба твоя есть не многа? безчисленнии же твои суть греси?
6 В залог бо имал еси от братии твоея вотще, одежду же нагих отнимал еси,
7 ниже водою жаждущих напоил еси, но алчущих лишилъ еси хлеба:
8 удивлялся же еси неких лицу и повергал еси убогих на земли:
9 вдовицы же отпустил еси тщи и сироты озлобилъ еси.
10 Сего ради обыдоша тя сети, и поспеши на тя рать велика:
11 свет тебе тма бысть, уснувшаго же вода тя покры.
12 Еда на высоких живый не призираетъ? укоризною же возносящихся смири.
13 И рекл еси: что разуме крепкий? или во мраце разсудитъ?
14 облак покров его, и неувидимь будет, и кругъ небесе обходит.
15 Еда стезю древнюю сохраниши, в нюже ходиша мужие неправедни,
16 иже яти быша прежде времене? река текущая основания их,
17 глаголющии: что сотворит нам господь? или что нанесетъ на ны вседержитель?
18 Иже исполнил есть домы их благими: советъ же нечестивых далече от него.
19 Видевше праведницы возсмеяшася, непорочен же глумляшеся им:
20 не погибе ли имение их, и останки их поястъ огнь?
21 Буди убо тверд, аще претерпиши, потом плодъ твой будет во благих.
22 Приими же из уст его изречение и восприими словеса его в сердце твое.
23 Аще же обратишися и смириши себе пред господем, и далече сотвориши от жилища твоего неправду,
24 и положен будеши на персти в камени, и якоже камень потока офирска.
25 Будет убо тебе вседержитель помощник от враг, чиста же сотворит тя якоже сребро разжжено,
26 потом дерзновение возымееши пред богом, воззревъ весело на небо.
27 Помольшуся же тебе к нему, услышит тя, дастъ же ти обеты твоя воздати,
28 устроит же ти жилище правды, на путех же твоихъ будет свет:
29 яко смирил еси себе, тогда речеши: вознесеся, и поникша очима спасет,
30 избавит неповиннаго, и спасешися чистыма рукама твоима.

Глава 23.
1 отвещав же иов, рече:
2 вем убо, яко из руки моея обличение мое есть, и рука его тяжка бысть паче моего воздыхания.
3 Кто убо увесть, яко обрящу его и прииду ко кончине?
4 И реку мой суд, уста же моя исполню обличения,
5 уразумею же изцеления, яже ми речет, и ощущу, что ми возвестит.
6 И аще со многою крепостию найдет на мя, посем же не воспретит ми.
7 Истина бо и обличение от него: да изведет же в конецъ суд мой.
8 Аще бо во первых пойду, ктому несмь: в последнихъ же, како вем его?
9 ошуюю творящу ему, и не разумех: обложит одесную, и не узрю.
10 Весть бо уже путь мой, искуси же мя яко злато.
11 Изыду же в заповедех его, пути бо его сохраних, и не уклонюся от заповедий его
12 и не преступлю, в недрех же моих сокрых глаголы его.
13 Аще же и сам судил тако, кто есть рекий противу ему? сам бо восхоте и сотвори.
14 Сего ради о нем трепетен бых, наказуемь же попекохся о нем:
15 сего ради от лица его потщуся, поучуся и убоюся от него.
16 И господь умягчил сердце мое, и вседержитель потщася о мне:
17 не ведех бо, яко найдет на мя тма, пред лицемъ же моим покрыет мрак.

Глава 24.
1 Почто же господа утаишася часы,
2 нечестивии же предел преидоша, стадо с пастырем разграбивше?
3 Подъяремника сирых отведоша и вола вдовича в залогъ взяша:
4 уклониша немощных от пути праведнаго, вкупе же скрышася кротцыи земли:
5 изыдоша же, яко осли на село, на мя, изступивше своего чина: сладок бысть хлеб им ради юных.
6 Ниву прежде времене не свою сущу пожаша, немощнии же виноград нечестивых без мзды и без брашна возделаша:
7 нагих многих успиша без риз, одежду же душиих отяша:
8 каплями горскими мокнут, занеже не имеяху покрова, в камение облекошася:
9 восхитиша сироту от сосца, падшаго же смириша:
10 нагия же успиша неправедно, от алчущих же хлебъ отяша:
11 в теснинах неправедно заседоша, пути же праведнаго не ведеша.
12 Иже из града и из домов своих изгоними бываху, душа же младенцев стеняше вельми: бог же почто сихъ посещения не сотвори?
13 На земли сущим им, и не разумеша, пути же праведнаго не ведеша, ни по стезям его ходиша.
14 Разумев же их дела, предаде их во тму, и въ нощи будет яко тать.
15 И око прелюбодея сохрани тму, глаголя: не узритъ мя око: и покрывало лицу наложи.
16 Прокопа в нощи храмины, во днех же запечатлеша себе, не познаша света:
17 яко абие заутра им сень смерти, понеже познаетъ мятеж сени смертныя.
18 Легок есть на лицы воды: проклята буди часть ихъ на земли, да явятся же садовия их на земли суха:
19 рукоятие бо сирых разграбиша.
20 Потом воспомянен бысть ему грех, и якоже мгла росы изчезе: воздано же буди ему, еже содея, сокрушен же буди всяк неправдив яко древо неизцельно:
21 неплодней бо не добро сотвори и жены не помилова.
22 яростию же низврати немощныя: востав убо не имать веры яти о своем житии.
23 Егда же разболится, да не надеется здрав быти, но падет недугом.
24 Многи бо озлоби высота его: увяде же яко злакъ в знои, или якоже клас от стебла сам отпад.
25 Аще же ни, кто есть глаголяй лжу ми глаголати, и положит ни во чтоже глаголы моя?

Глава 25.
1 отвещав же валдад савхейский, рече:
2 что бо начало, аще не страх от него, иже творитъ всяческая в вышнихъ?
3 Да никтоже бо мнит, яко есть умедление воинством: и на кого не найдет навет от него?
4 Како бо будет праведн человек пред богомъ? или кто очистит себе рожденный от жены?
5 Аще луне повелевает, и не сияет, звезды же нечисты суть пред ним,
6 кольми паче человек гной, и сын человеческий червь.

Глава 26.
1 отвещав же иов, рече:
2 кому прилежиши, или кому хощеши помогати? не сему ли, емуже многа крепость и емуже мышца крепка есть?
3 Кому совет дал еси? не емуже ли вся премудрость? Кого поженеши? не емуже ли превелия сила?
4 Кому возвестил еси глаголы? дыхание же чие есть исходящее из тебе?
5 Еда исполини родятся под водою и соседми ея?
6 Наг ад пред ним, и несть покрывала пагубе.
7 Простираяй север ни на чемже, повешаяй землю ни начемже,
8 связуяй воду на облацех своих, и не расторжеся облакъ под нею:
9 держай лице престола, простирая над ним облакъ свой:
10 повеление окружи на лице воды даже до скончания света со тмою.
11 Столпи небеснии прострошася и ужасошася от запрещения его.
12 Крепостию укроти море, и хитростию его низложенъ бысть кит:
13 вереи же небесныя убояшася его: повелениемъ же умертви змиа отступника.
14 Се, сия части пути его: и о капли слова услышимъ в нем: силу же грома его кто уведа, когда сотворитъ?

Глава 27.
1 Еще же приложив иов, рече в притчах:
2 жив господь, иже ми сице суди, и вседержитель, иже огорчи ми душу:
3 дондеже еще дыхание мое есть и дух божий сущий в ноздрех моих,
4 не возглаголют устне мои беззакония, ниже душа моя поучится неправде.
5 Не буди мне правдивыми нарещи вас, дондеже умру: не изменю бо незлобия моего.
6 Правде же внимая, не оставлю ея, не свем бо себе злых соделавша.
7 обаче же, дабы были врази мои, якоже низвращение нечестивых, и востающии на мя, якоже пагуба пребеззаконных.
8 И кая бо есть надежда нечестивому, яко ожидаетъ? надеяся на господа спасется ли?
9 или мольбу его услышит богъ? или нашедшей ему беде,
10 еда имать кое дерзновение пред нимъ? или яко призвавшу ему, услышит ли его?
11 Сего ради возвещу вам, что есть в руце господни, и, еже есть у вседержителя, не солжу.
12 Се, вси весте, яко тщетная ко тщетным прилагаете.
13 Сия часть человека нечестиваго от господа: и жребий сильных приидет от вседержителя на ня.
14 Аще мнози будут сынове их, на заколение будут:аще же и возмужают, нищи будут:
15 оставшиися же ему смертию умрут, и вдовицъ их никтоже помилует.
16 Аще соберет якоже землю сребро, и якоже брение уготовит злато,
17 сия вся праведнии одержат, имения же его истиннии возмут:
18 будет же дом его яко молие, и яко паучина, яже снабде.
19 Богатый уснет и не приложит, очи свои отверзе, и несть.
20 обыдоша его якоже вода болезни, нощию же ятъ его примрак.
21 Возмет же его вар, и отидет, и возвеет его от места его,
22 и вержет на него, и не пощадит, из руку его бежанием побежит:
23 восплещет нань рукама своима и с шумом возмет его от места своего.

Глава 28.
1 Есть бо сребру место, отонудуже и бывает, и место злату, отонудуже очищается.
2 Железо бо из земли раждается, медь же равно камению сечется.
3 Чин положи тме, и вся концы сам испытует, камыкъ тмы и сень смерти.
4 Пресечение потока от праха: забывающии же путь правый изнемогоша, от человек подвигошася.
5 Есть земля, из неяже изыдет хлеб: под нею обратися яко огнь.
6 Место сапфира камение ея, и персть злато ему.
7 Стезя, не позна ея птица, и не узре ю око супово,
8 и не ходиша по ней сынове величавых, и не прейде по ней лев.
9 На несекоме камени простре руку свою, преврати же из корения горы:
10 бреги рек расторже, всякое же честное виде око мое:
11 глубины же рек откры и показа силу свою на свет.
12 Премудрость же откуду обретеся? и кое место есть ведения?
13 Не весть человек пути ея, ниже обретеся въ человецех.
14 Бездна рече: несть во мне: и море рече: несть со мною.
15 Не дастся сокровище за ню, и не извесится сребро на изменение ея,
16 и не сравнится со златом софирским, со ониксомъ честным и сапфиром:
17 не равно будет ей злато и кристаль, и изменение ея сосуди злати.
18 Превысокая и бисерие не помянутся, и притяжи премудрость паче внутреннейших:
19 не уравнится ей топазий ефиопский, со златомъ чистым не сравнится.
20 Премудрость же откуду обретеся? и кое место есть разуму?
21 утаися от всякаго человека, и от птиц небесныхъ скрыся.
22 Пагуба и смерть рекосте: слышахом ея славу.
23 бог благо позна ея путь: сам бо весть место ея.
24 Ибо сам поднебесную всю надзирает, ведый, яже на земли, вся, яже сотвори.
25 Ветров вес и воде меру егда сотворил,
26 тако видяй сочте, и путь в сотрясении гласов,
27 тогда виде ю и поведа ю, уготовав изследи
28 и рече человеку: се, благочестие есть премудрость, а еже удалятися от зла есть ведение.

Глава 29.
1 Еще же приложив иов, рече в притчах:
2 кто мя устроит по месяцам преждних дний, в нихже мя бог храняше,
3 якоже егда светяшеся светилник его над главою моею, егда светом его хождах во тме,
4 егда бех тяжек в путех, егда бог посещение творяше дому моему,
5 егда бех богат зело, окрест же мене раби,
6 егда обливахуся путие мои маслом кравиим, горы же моя обливахуся млеком,
7 егда исхождах изутра во град, на стогнах же поставляшеся ми престолъ?
8 Видяще мя юноши скрывашася, старейшины же вси воставаша:
9 вельможи же преставаху глаголати, перст возложше на уста своя.
10 Слышавшии же блажиша мя, и язык их прильпе гортани их:
11 яко ухо слыша и ублажи мя, око же видевъ мя уклонися.
12 Спасох бо убогаго от руки сильнаго, и сироте, емуже не бе помощника, помогох.
13 Благословение погибающаго на мя да приидет, уста же вдовича благословиша мя.
14 В правду же облачахся, одевахся же в суд яко в ризу.
15 око бех слепым, нога же хромым:
16 аз бых отец немощным, распрю же, еяже не ведях, изследих:
17 сотрох же членовныя неправедных, от среды же зубовъ их грабление изъях.
18 Рех же: возраст мой состареется якоже стебло финиково, многа лета поживу.
19 Корень разверзеся при воде, и роса пребудет на жатве моей.
20 Слава моя нова со мною, и лук мой в руце моей пойдет.
21 (Старейшины) слышавшии мя внимаху, молчаху же о моемъ совете.
22 К моему глаголу не прилагаху, радовахуся же, егда к ним глаголах:
23 якоже земля жаждущая ожидает дождя, тако сии моего глаголания.
24 Аще возсмеюся к ним, не вериша: и свет лица моего не отпадаше.
25 Избрах путь их, и седех князь, и вселяхся якоже царь посреде храбрых, аки утешаяй печальных.

Глава 30.
1 ныне же поругашамися малейшии: ныне учатъ мя от части, ихже отцев уничтожах, ихже не вменях достойными псов моих стад.
2 Крепость же рук их во что мне бысть? у нихъ погибаше скончание.
3 В скудости и гладе безплоден: иже бежаху в безводное вчера сотеснение и бедность:
4 иже обхождаху былие в дебрех, имже былие бяше брашно, безчестнии же и похуленнии, скудни всякаго блага, иже и корение древес жваху от глада великаго.
5 Восташа на мя татие,
6 ихже домове беша пещеры каменны:
7 от среды доброгласных возопиют, иже под хврастиемъ дивиим живяху:
8 безумных сынове и безчестных, имя и слава угашена на земли.
9 ныне же гусли есмь аз им, и мене в притчу имут:
10 возгнушалися же мною отступивше далече, ни лица моего пощадеша от плюновения.
11 отверз бо тул свой уязви мя, и узду устамъ моим наложи.
12 На десную отрасли восташа, нозе свои простроша и путесотвориша на мя стези пагубы своея.
13 Сотрошася стези моя, совлекоша бо ми одежду.
14 Стрелами своими устрели мя: сотвори ми, якоже восхоте: в болезнех скисохся, обращаются же ми скорби.
15 отиде ми надежда якоже ветр, и якоже облакъ спасение мое.
16 И ныне на мя излиется душа моя: и одержат мя дние печалей:
17 нощию же кости моя смятошася, жилы же моя разслабеша.
18 Многою крепостию ятся за ризу мою: якоже ожерелие ризы моея объя мя.
19 Вменяеши же мя равна брению, в земли и пепеле часть моя.
20 Возопих же к тебе, и не услышал мя еси: сташа же и смотриша на мя.
21 Наидоша же на мя без милости, рукою крепкою уязвилъ мя еси:
22 вчинил же мя еси в болезнех и отвергл еси мя от спасения.
23 Вем бо, яко смерть мя сотрет: дом бо всякому смертну земля.
24 Аще бы возможно было, сам бых себе убил, или молил бых иного, дабы ми то сотворил.
25 Аз же о всяцем немощнем восплакахся, воздохнухъ же видев мужа в бедах.
26 Аз же ждах благих, и се, сретоша мя паче дние зол.
27 Чрево мое воскипе и не умолчит: предвариша мя дние нищеты.
28 Стеня ходих без обуздания, стоях же в соборе вопия.
29 Брат бых сиринам, друг же птичий.
30 Кожа же моя помрачися вельми, и кости моя сгореша от зноя.
31 обратишася же в плачь гусли моя, песнь же моя въ рыдание мне.

Глава 31.
1 Завет положих очима моима, да не помышлю на девицу.
2 И что удели бог свыше, и наследие всесильнаго от вышнихъ?
3 увы, пагуба неправдивому и отчуждение творящимъ беззаконие.
4 Не сам ли узрит путь мой и вся стопы моя изочтетъ?
5 Аще ходих с посмеятели, и аще потщася нога моя на лесть,
6 стах бо на мериле праведне, виде же господь незлобие мое.
7 Аще уклонися нога моя от пути, аще и вследъ ока моего иде сердце мое, и аще рукама моима прикоснухся даров,
8 да посею убо, а инии да поядят, без корене же да бых был на земли.
9 Аще вслед иде сердце мое жены мужа инаго, и аще приседяй бых при дверех ея,
10 угодна убо буди и жена моя иному мужу, младенцы же мои смирени да будут:
11 ярость бо гнева не удержана, еже осквернити мужа инаго жену:
12 огнь бо есть горяй на вся страны, идеже найдет, из корения погубит.
13 Аще же презрех суд раба моего или рабыни, прящимся им предо мною:
14 что бо сотворю, аще испытание сотворит ми господь? аще же и посещение, кий ответ сотворю?
15 Еда не якоже и аз бех во чреве, и тии быша? бехом же в томже чреве.
16 Немощнии же, аще когда чесого требоваху, не не получиша, вдовича же ока не презрех.
17 Аще же и хлеб мой ядох един и сирому не преподах от него:
18 понеже от юности моея кормих якоже отец, и от чрева матере моея наставлях:
19 аще же презрех нага погибающа и не облекох его:
20 немощнии же аще не благословиша мя, от стрижения же агнцев моих согрешася плещи их:
21 аще воздвигох на сироту руку, надеяся, яко многа помощь мне есть:
22 да отпадет убо рамо мое от состава, мышца же моя от лактя да сокрушится:
23 страх бо господень объя мя, и от тягости его не стерплю.
24 Аще вчиних злато в крепость мою и аще на камения многоценная надеяхся,
25 аще же и возвеселихся, многу ми богатству сущу, аще же и на безчисленных положих руку мою:
26 или не видим солнца возсиявшаго оскудевающа, луны же умаляющияся? не в них бо есть:
27 и аще прельстися отай сердце мое, аще и руку мою положив на устах моих лобзах:
28 и сие ми убо в беззаконие превелие да вменится, яко солгах пред богом вышним.
29 Аще же обрадовахся о падении враг моих, и рече сердце мое: благоже, благоже:
30 да услышит убо ухо мое клятву мою, озлославленъ же да буду от людий моих озлобляемь.
31 Аще же и многажды реша рабыни моя: кто убо далъ бы нам от плотей его насытитися, зело мне благу сущу?
32 И вне не водворяшеся странник, дверь же моя всякому приходящему отверста бе.
33 Аще же и согрешая неволею, скрых грех мой:
34 не посрамихся бо народнаго множества, еже не поведати пред ними: аще же и оставих маломощнаго изыти изъ дверий моих тщим недром: (аще бы не убоялся).
35 Кто даст слушающаго мене? руки же господни аще быхъ не убоялся, писание же, еже имех на кого,
36 на плещах возложив аки венец, читах,
37 и аще не раздрав его отдах, ничтоже взем от должника:
38 аще на мя когда земля возстена, аще и бразды ея восплакашася вкупе:
39 аще и силу ея ядох един без цены, или аще и душу господина земли взем оскорбих:
40 вместо пшеницы да взыдет ми кропива, а вместо ячменя терние.

Глава 32.
1 И умолча иов словесы. умолчаша же и трие друзие его ктому пререковати иову, бе бо иов праведн пред ними.
2 Разгневася же елиус сын варахиилев вузитянин, от ужичества арамска авситидийския страны, разгневася же на иова зело, занеже нарече себе праведна предъ богом,
3 и на триех же другов разгневася зело, яко не возмогоша отвещати противу иову и судиша его быти нечестива.
4 Елиус же терпяше дати ответ иову, яко старейшии его суть деньми (друзие его).
5 И виде елиус, яко несть ответа во устехъ триех мужей, и возъярися гневом своим.
6 отвещав же елиус сын варахиилев вузитянин, рече: юнейший убо есмь леты, вы же есте старейшии: темже молчах, убоявся возвестити вам хитрость мою:
7 рех же: время есть глаголющее, и во мнозех летехъ ведят премудрость,
8 но дух есть в человецех, дыхание же вседержителево есть научающее:
9 не многолетнии суть премудри, ниже старии ведятъ суд:
10 темже рех: послушайте мене, и возвещу вам, яже вем, внушите глаголы моя:
11 реку бо вам послушающим, дондеже испытаете словеса, и даже вас уразумею,
12 и се, не бе иова обличаяй, отвещаяй противно глаголом его от вас:
13 да не речете: обретохом премудрость, господеви приложившеся:
14 человеку же попустисте глаголати таковая словеса:
15 ужаснушася, не отвещаша ктому, обетшаша от нихъ словеса:
16 терпех, не глаголах бо, яко сташа, не отвещаша, яко да отвещаю и аз часть.
17 отвеща же елиус, глаголя:
18 паки возглаголю, исполнен бо есмь словес: убиваетъ бо мя дух чрева:
19 чрево же мое яко мех мста вряща завязан, или якоже мех коваческий расторгнутый:
20 возглаголю, да почию, отверз уста:
21 человека бо не постыждуся, но ниже бреннаго посрамлюся:
22 не вем бо чудитися лицу: аще же ни, то и мене молие изъядят.

Глава 33.
1 Но послушай, иове, словес моих и беседу мою внуши:
2 се бо, отверзох уста моя, и возглагола языкъ мой:
3 чисто сердце мое во словесех, разум же устну моею чистая уразумеет:
4 дух божий сотворивый мя, дыхание же вседержителево поучающее мя:
5 аще можеши, даждь ми ответ к сим: потерпи, стани противу мене, и аз противу тебе.
6 от брения сотворен еси ты, якоже и аз: от тогожде сотворения есмы:
7 не страх мой тя смятет, ниже рука моя тяжка будетъ на тя.
8 обаче рекл еси во уши мои, и глас глаголъ твоих услышах, занеже глаголеши:
9 чист есмь аз, не согрешая, непорочен же есмь, ибо не беззаконновах:
10 зазор же на мя обрете и мнит мя, яко противника себе:
11 вложи же ногу мою в древо и надсмотрял пути моя вся.
12 Како бо глаголеши, яко прав есмь, и не послуша мене? Вечен бо есть, иже над земными.
13 Глаголеши бо: чесо ради правды моея не услыша всяко слово?
14 Единою бо возглаголет господь, второе же во сне, или в поучении нощнем,
15 или, яко егда нападает страх лют на человеки, во дреманиих на ложи:
16 тогда открыет ум человеческий, виденьми страха тацеми их устрашит,
17 да возвратит человека от неправды, тело же егоот падения избави,
18 пощаде же душу его от смерти, еже не пасти ему на брани.
19 Паки же обличи его болезнию на ложи и множество костей его разслаби:
20 всякаго же брашна пшенична не возможет прияти, а душа его яди хощет,
21 дондеже согниют плоти его, и покажет кости его тощя:
22 приближися же на смерть душа его, и живот его во аде.
23 Аще будет тысяща ангел смертоносных, един от них не уязвит его: аще помыслит сердцем обратитися ко господу, повесть же человеку свой зазор, и безумие свое покажет,
24 заступит е, еже не впасти ему в смерть, обновитъ же тело его якоже повапление на стене, кости же его исполнит мозга:
25 умягчит же его плоть якоже младенца, и устроитъ его возмужавша в человецех.
26 Помолится же ко господу и прият им будет, внидетъ же лицем веселым со исповеданием, воздаст же человекомъ правду свою.
27 Посем тогда зазрит человек сам себе, глаголя: яковая содевахъ? и не по достоинству истяза мя, о нихже согреших:
28 спаси душу мою, еже не внити во истление, и жизнь моя свет узрит.
29 Се, сия вся творит крепкий (богъ) пути три с мужем:
30 но избави душу мою от смерти, да живот мой во свете хвалит его.
31 Внимай, иове, и послушай мене, премолчи, и азъ возглаголю:
32 и аще тебе суть словеса, отвещай ми: глаголи, хощу бо оправдитися тебе:
33 аще же ни, ты послушай мене, умолчи, и научу тя премудрости.

Глава 34.
1 отвещав же елиус, рече:
2 послушайте мене, премудрии: сведущии, внушите (доброе),
3 яко ухо словеса искушает, гортань же вкушаетъ брашна.
4 Суд изберем себе, уразумеем посреде себе, что лучшее.
5 яко рече иов: праведн есмь, господь отят ми суд,
6 солга же суду моему: насильна стрела моя без неправды.
7 Кто муж, якоже иов, пияй поругание, якоже воду,
8 не согрешая, ниже нечествовав, ниже приобщився къ творящим беззакония, еже ходити с нечестивыми?
9 Не рцы бо, яко несть посещения мужеви, и посещения ему от господа.
10 Темже, разумивии сердцем, послушайте мене, не буди ми пред господем нечествовати и пред вседержителем возмутити правду:
11 но воздает человекови, якоже творит кийждо их, и на стези мужестей обрящет и.
12 Мниши же господа нелепая сотворити, или вседержитель смятет суд, иже сотвори землю?
13 Кто же есть творяй поднебесную и яже в ней всяческая?
14 Аще бо восхощет запретити и дух у себе удержати,
15 умрет всяка плоть вкупе, всяк же человек въ землю пойдет, отнюдуже и создан бысть.
16 Аще же не увещаешися, послушай сих, внуши гласъ глагол.
17 Виждь ты ненавидящаго беззаконная и губящаго лукавыя, суща, вечна, праведна.
18 Нечестив есть глаголяй цареви, закон преступаеши, нечестивейше, князем:
19 иже не постыдеся лица честнаго, ниже весть честь возложити сильным, удивитися лицам их.
20 Тще же им сбудется, еже возопити и молити мужа: зане употребиша беззаконно, безчестяще немощных.
21 Той бо зритель есть дел человеческих, утаися же от него ничтоже от тех, яже творят:
22 ниже будет место укрытися творящим беззаконная:
23 яко не на мужа положит еще.
24 господь бо всех видит, постизаяй неизследная, славная же и изрядная, имже несть числа,
25 сведый их дела, и обратит нощь, и смирятся.
26 угаси же нечестивыя, видими же пред ним:
27 яко уклонишася от закона божия, оправданий же его не познаша,
28 еже вознести к нему вопль нищих, и вопль убогихъ услышит.
29 И той тишину подаст, и кто осудитъ? и сокрыетъ лице, и кто узрит его? и на язык, и на человека вкупе,
30 иже поставляет царем человека лицемера за строптивость людий.
31 яко к крепкому глаголяй: взях, не отиму вместо залога:
32 без мене узрю, ты покажи ми: аще неправду соделах, не имам приложити.
33 Еда от тебе истяжет ю, яко ты отринеши, яко ты избереши, а не аз ли? и что разумееши? глаголи.
34 Темже смысленнии сердцем рекут сия, муж же премудръ услыша глагол мой.
35 иов же не в разуме глаголаше, словеса же его не в хитрости.
36 обаче навыкни, иове, не даждь еще ответа, якоже немудрии:
37 да не приложим на грехи наша: беззаконие же на насъ вменится, многая глаголющих словеса на господа.

Глава 35.
1 отвещав же еще елиус, рече:
2 что сие мнил еси на суде? ты кто еси, яко рекл еси: прав есмь пред господемъ?
3 Или речеши: что сотворю согрешивъ?
4 Аз же ти дам ответ и трием другом твоим.
5 Воззри на небо и виждь: смотри же на облаки, коль высоки суть от тебе.
6 Аще согрешил еси, что сотвориши? аще же и много беззаконновал еси, что можеши сотворити?
7 Понеже убо праведен еси, что даси ему? или что из руки твоея возметъ?
8 Мужеви подобному тебе нечестие твое, и сыну человеческому правда твоя.
9 от множества оклеветаемии воззовут, возопиют от мышцы многих:
10 и не рече: где есть бог сотворивый мя, устрояяй стражбы нощныя,
11 отделяяй мя от четвероногих земных и от небесныхъ птицъ?
12 тамо воззовут, и не имаши услышати, и от досады злых.
13 Безместная бо видети не хощет господь: сам бо вседержитель зритель есть творящих беззаконная, и спасет мя.
14 Судися же пред ним, аще можеши похвалити его, якоже есть и ныне.
15 яко несть посещаяй гневом своим, и не позна прегрешения коеголибо зело.
16 иов же всуе отверзает уста своя, неведениемъ словеса отягощает.

Глава 36.
1 Приложив же еще елиус, рече:
2 пожди ми мало еще, да тя научу: еще бо у мене есть слово.
3 Приим хитрость мою отдалеча, делы же моими праведная реку воистинну:
4 и не неправедны глаголы без правды уразумееши.
5 Виждь же, яко господь не отринет незлобиваго:
6 силен крепостию сердца нечестивых не оживит и судъ нищим даст,
7 не отимет от правдиваго очес своих, и со цари на престоле посадит их на победу, и вознесутся.
8 Связаннии в ручных узах яти будут ужами нищеты,
9 и возвестит им дела их и прегрешение их, яко укрепятся:
10 но правдиваго услышит, и рече, яко обратятся от неправды.
11 Аще услышат и поработают, скончают дни своя во благих и лета своя в благолепоте:
12 нечестивых же не спасет, зане не хотеша познати господа и занеже учими не послушливи беша.
13 И лицемери сердцем возмутят ярость: не возопиют, яко связа их:
14 да умрет убо в юности душа их, житие же их уязвляемо ангелы,
15 занеже оскорбиша недужна и немощна, суд же кроткихъ изложит.
16 Еще же исторгну тя от уст вражиих: бездна, пролитие под нею, и сниде трапеза твоя исполнена тука.
17 Не оскудеет же от праведных суд:
18 ярость же на нечестивыя будет, нечестия ради даровъ их, ихже приимаху на неправде.
19 Да не уклонит тя волею ум от мольбы в беде сущих немощных и всех содержащих крепость.
20 Не привлецы нощи, еже взыти людем вместо их:
21 но сохранися, да не содееши зла: сих бо ради изъятъ еси от нищеты.
22 Се, крепкий удержит крепостию своею: кто бо есть, якоже той, силенъ?
23 и кто есть испытуяй дел его? или кто рекий: содея неправду?
24 Помяни, яко велия дела его суть, имиже владеша мужие.
25 Всяк человек видит в себе, елицы уязвляеми суть человецы.
26 Се, крепкий великий, и не увемы: число летъ его безконечное:
27 изочтенны же ему суть капли дождевныя, и излиются дождем во облак:
28 потекут обетшания, осениша же облацы над премногими людьми: время постави скоту, ведят же ложа чин. о всех сих не дивитлитися ум, и не изменяетлися ти сердце от тела?
29 И аще уразумеет простертие облака, равенство скинии его:
30 се, простирает на ню свет и корения морская покры:
31 теми бо судит людем, даст пищу могущему.
32 На руку покры свет и заповеда о нем сретающему:
33 возвестит о нем другу своему господь, стяжание, и о неправде.

Глава 37.
1 И от сих возмятеся сердце мое и отторжеся от места своего.
2 Послушай слуха во гневе ярости господни, и поучение изо уст его изыдет.
3 Под всем небом началство его, и свет его на крилу земли.
4 Вслед его возопиет гласом, возгремит гласомъ величия своего, и не изменит их, яко услышитъ глас его.
5 Возгремит крепкий гласом своим дивная: сотвори бо велия, ихже не ведахом.
6 Повелеваяй снегу: буди на земли, и буря дождя, и буря дождев могутства его.
7 В руце всякаго человека знаменает, да познает всякъ человек свою немощь.
8 Внидоша же зверие под кров и умолкоша на ложи.
9 Из хранилищ внутренних находят болезни, и от внешнихъ стран студень.
10 И от дыхания крепка даст лед: управляет же воду, якоже хощет,
11 и избранное устрояет облак: разженет облакъ свет его,
12 и сам окрестная превратит, якоже хощет, в дела их: вся, елика заповесть им, сия чиноположена суть от него на земли,
13 аще в наказание, аще на землю свою, аще на милость обрящет и.
14 Внуши сия, иове: стани учайся силе господни.
15 Вемы, яко господь положи дела своя, свет сотворивъ из тмы.
16 Весть же различие облаков и велия падения злых.
17 Твоя же одежда тепла, почивает же на земли от юга.
18 утверждения с ним в древности, крепка якоже видение слития.
19 Чесо ради, научи мя, что речем ему? и престанемъ многа глаголюще.
20 Еда книга, или книгочиа ми предстоитъ? да стоящь сотворю человеку молчати.
21 Не всем же видимь свет: светлый есть в древностех, якоже еже от него на облацех.
22 от севера облацы златозарни: в сих велия слава и честь вседержителева.
23 И не обретаем иного подобна крепости его: иже судит праведно, мниши ли, яко не слышит той?
24 Темже убоятся его человецы: убоятся же его и премудрии сердцем.

Глава 38.
1 Преставшу же елиусу от беседы, рече господьиову сквозе бурю и облаки:
2 кто сей скрываяй от мене совет, содержай же глаголы в сердцы, мене же ли мнится утаити?
3 Препояши яко муж чресла твоя: вопрошу же тя, ты же ми отвещай.
4 Где был еси, егда основах землю? возвести ми, аще веси разум.
5 Кто положи меры ея, аще веси? или кто наведый вервь на ню?
6 На чемже столпи ея утверждени суть? ктоже есть положивый камень краеуголный на ней?
7 Егда (сотворены) быша звезды, восхвалиша мя гласомъ велиим вси ангели мои.
8 Заградих же море враты, егда изливашеся из чрева матере своея исходящее:
9 положих же ему облак во одеяние, мглою же повихъ е:
10 и положих ему пределы, обложив затворы и врата:
11 рех же ему: до сего дойдеши и не прейдеши, но въ тебе сокрушатся волны твоя.
12 Или при тебе составих свет утренний, денница же весть чин свой,
13 ятися крил земли, оттрясти нечестивыя от нея?
14 Или ты, брение взем, от земли создал еси животно, и глаголиваго сего посадил еси на земли?
15 отял же ли еси от нечестивых свет, мышцу же гордых сокрушил ли еси?
16 Пришел же ли еси на источники моря, во следахъ же бездны ходил ли еси?
17 отверзаются же ли тебе страхом врата смертная, вратницы же адовы видевше тя убояшася ли?
18 Навыкл же ли еси широты поднебесныя? Повеждь убо ми, колика есть?
19 В коей же земли вселяется свет, тме же кое есть место?
20 Аще убо введеши мя в пределы их, аще же ли и веси стези ихъ?
21 Вем убо, яко тогда рожден еси, число же лет твоих много.
22 Пришел же ли еси в сокровища снежная, и сокровища градная видел ли еси?
23 подлежат же ли тебе в час врагов, в день браней и рати?
24 откуду же исходит слана, или разсыпается юг на поднебесную?
25 Кто же уготова дождю велию пролияние, и путь молнии и грома,
26 одождити на землю, на нейже несть мужа, пустыню, идеже человека несть в ней,
27 насытити непроходиму и ненаселену, и прозябнути исходъ злака?
28 Кто есть дождю отецъ? кто же есть родивый капли росныя?
29 Из чиего чрева исходит ледъ? Слану же на небеси кто родил,
30 яже нисходит яко вода текущая? Лице нечестива кто устраши?
31 Разумел же ли еси соуз плиад, и ограждение орионово отверзл ли еси?
32 Или отверзеши знамения небесная во время свое? и вечернюю звезду за власы ея привлечеши ли?
33 Веси же ли пременения небесная, или бывающая вкупе под небесемъ?
34 Призовеши же ли облак гласомъ? и трепетом воды великия послушает ли тя?
35 Послеши же ли молнии, и пойдутъ? рекут же ли ти: что есть?
36 Кто же дал есть женам ткания мудрость, или испещрения хитрость?
37 Кто же изчисляяй облаки премудростию, небо же на землю преклонил,
38 разлияся же яко земля прах, спаях же е, аки каменем, на четыри углы?
39 уловиши же ли львам ядь, и души змиев насытиши ли?
40 убояшася бо на ложах своих и седят в дебрехъ уловляюще.
41 Кто же врану уготова пищу? птичищи бо его ко господу воззваша, облетающе брашна ищуще.

Глава 39.
1 Аще уразумел еси время рождения козъ живущих на горах каменныхъ? усмотрил же ли еси болезнь при рождении еленей?
2 изчислил же ли еси месяцы их исполнены рождения их, болезни же их разрешил ли еси?
3 Вскормил же ли еси детищи их вне страха, болезни же их отслеши ли?
4 извергнут чада своя, умножатся в порождении, изыдутъ и не возвратятся к ним.
5 Кто же есть пустивый осла дивияго свободна, узы же его кто разрешилъ?
6 Положих же жилище его пустыню и селения его сланость:
7 смеяйся многу народу града, стужания же данническаго не слышай,
8 усмотрит на горах пажить себе и вслед всякаго злака ищет.
9 Похощет же ли ти единорог работати, или поспати при яслех твоихъ?
10 привяжеши ли ремением иго его, и провлечет ти бразды на поли?
11 надеешилися нань, яко многа крепость его? попустиши же ли ему дела твоя?
12 повериши же ли, яко воздаст ти семя? внесет же ли ти в гумно?
13 Крило веселящихся нееласса, аще зачнет асида и несса?
14 яко оставит на земли яица своя, и на персти согреет,
15 и забы, яко нога разбиет, и зверие селнии поперут:
16 ожесточися на чада своя, аки бы не ея, вотще трудися без страха,
17 яко сокры бог ей премудрость и не удели ей в разуме:
18 во время же на высоту вознесет, посмеется коню и седящему на нем.
19 Или ты обложил еси коня силою, и облекл же ли еси выю его в страхъ?
20 обложил же ли еси его всеоружием, славу же персей его дерзостию?
21 копытом копая на поли играет и исходит на поле с крепостию:
22 сретая стрелы посмеявается и не отвратится от железа:
23 над ним играет лук и мечь,
24 и гневом потребит землю и не имать веры яти, дондеже вострубит труба:
25 трубе же вострубившей глаголет, благоже: издалеча же обоняет рать, со скаканием и ржанием.
26 И твоею ли хитростию стоит ястреб, распростер криле недвижимь, зря на югъ?
27 Твоим же ли повелением возносится орел, неясыть же на гнезде своем седя вселяется,
28 на версе камене и в сокровене?
29 тамо же сый ищет брашна, издалеча очи его наблюдают,
30 птичищи же его валяются в крови: идеже аще будутъ мертвечины, абие обретаются.
31 И отвеща господь бог ко иову и рече:
32 еда суд со всесильным укланяется? обличаяй же бога отвещати имать ему.
33 отвещав же иов, рече господеви:
34 почто еще аз прюся, наказуемь и обличаемь от господа, слышай таковая ничтоже сый? аз же кий ответъ дам к симъ? руку положу на устех моих:
35 единою глаголах, вторицею же не приложу.

Глава 40.
1 Паки же отвещав господь, рече ко иову изъ облака:
2 ни, но препояши яко муж чресла твоя: вопрошу же тя, ты же ми отвещай.
3 Не отвергай суда моего: мниши ли мя инако тебе сотворша, разве да явишися правдивъ?
4 Еда мышца ти есть на господа, или гласом на него гремиши?
5 Приими же высоту и силу, в славу же и в честь облецыся:
6 пусти же ангелы гневом и всякаго укорителя смири,
7 величава же угаси и согной нечестивыя абие:
8 скрый же в землю вне вкупе и лица их безчестия исполни.
9 Исповем, яко может десница твоя спасти.
10 Но убо се, зверие у тебе, траву аки волове ядят:
11 се убо, крепость его на чреслех, сила же его на пупе чрева:
12 постави ошиб яко кипарис, жилы же его (яко уже) сплетены суть,
13 ребра его ребра медяна, хребет же его железо слияно.
14 Сиесть начало создания господня: сотворен поруган бытиангелы его:
15 возшед же на гору стреминную, сотвори радость четвероногимъ в тартаре:
16 под всяким древом спит, при рогозе и тростии и ситовии:
17 осеняют же над ним древеса велика с леторасльми и ветви напольныя:
18 аще будет наводнение, не ощутит: уповает, яко внидет иордан во уста его:
19 во око свое возмет его, ожесточився продиравитъ ноздри.
20 Извлечеши ли змиа удицею, или обложиши узду о ноздрех его?
21 или вдежеши колце в ноздри его? шилом же провертиши ли устне его?
22 возглаголет же ли ти с молением, (или) с прошениемъ кротко?
23 сотворит же ли завет с тобою? поймеши же ли его раба вечна?
24 поиграеши же ли с ним, якоже со птицею, или свяжеши его яко врабия детищу?
25 питаются ли же им языцы, и разделяют ли его финикийстии народи?
26 вся же плавающая собравшеся не подымут кожи единыя ошиба его, и корабли рыбарей главы его.
27 Возложиши же ли нань руку, воспомянув брань бывающую на теле его? и ктому да не будет.

Глава 41.
1 Не видел ли еси его, и глаголемым не удивился ли еси? не убоялся ли еси, яко уготовася ми? Кто бо есть противляяйся мне, или кто противостанет ми и стерпит,
2 аще вся поднебесная моя есть?
3 Не умолчу его ради и словом силы помилую равнаго ему.
4 Кто открыет лице облечения его, в согбение же персей его кто внидетъ?
5 Двери лица его кто отверзетъ? окрест зубовъ его страх,
6 утроба его щиты медяны, союз же его якоже смирит камень,
7 един ко другому прилипают, дух же не пройдет его:
8 яко муж брату своему прилепится, содержатся и не отторгнутся.
9 В чхании его возблистает свет: очи же его видение денницы.
10 Из уст его исходят аки свещи горящия, и размещутся аки искры огненныя:
11 из ноздрей его исходит дым пещи горящия огнемъ углия:
12 душа же его яко углие, и яко пламы изъ яст его исходит..
13 На выи же его водворяется сила, пред ним течетъ пагуба.
14 Плоти же телесе его сольпнушася: лиет нань, и не подвижится.
15 Сердце его ожесте аки камень, стоит же аки наковальня неподвижна.
16 обращшуся же ему, страх зверем четвероногимъ по земли скачущим.
17 Аще срящут его копия, ничтоже сотворят ему, копие вонзено и броня:
18 вменяет бо железо аки плевы, медь же аки древо гнило:
19 не уязвит его лук медян, мнит бо каменометную пращу аки сено:
20 аки стеблие вменишася ему млатове, ругаетжеся трусу огненосному.
21 Ложе его остни острии, всяко же злато морское под ним, якоже брение безчисленно.
22 Возжизает бездну, якоже пещь медяну: мнит же море яко мироварницу
23 и тартар бездны якоже пленника: вменил бездну в прохождение.
24 Ничтоже есть на земли подобно ему сотворено, поругано быти ангелы моими:
25 все высокое зрит: сам же царь всем сущим въ водах.

Глава 42.
1 отвещав же иов, рече ко господу:
2 вем, яко вся можеши, невозможно же тебе ничтоже.
3 Кто есть таяй от тебе совет, щадяй же словеса и от тебе мнится утаити? кто же возвестит ми, ихже не ведех, велия и дивная, ихже не знахъ?
4 Послушай же мене, господи, да и аз возглаголю: вопрошу же тя, ты же мя научи:
5 слухом убо уха слышах тя первее, ныне же око мое виде тя:
6 темже укорих себе сам, и истаях, и мню себе землю и пепел.
7 Бысть же егда изглагола господь вся глаголы сия иову, рече господь ко елифазу феманитину: согрешил еси ты и оба друзие твои: не глаголасте бо предо мною ничтоже истинно, якоже раб мои иов:
8 ныне же возмите седмь телцев и седмь овнов и идите ко рабу моему иову, и сотворит жертву о вас: иов же раб мой помолится о вас, понеже точию лице его прииму: аще бо не его ради, погубил бых убо вас: не глаголасте бо истины на раба моего иова.
9 отиде же елифаз феманитин и валдад савхейский и софар минейский и сотвориша, якоже повеле имъ господь. И отпусти грехи им иова ради.
10 господь же возрасти иова: молящуся же ему и о друзехъ своих, отпусти им грехи их, и даде господь сугубая, елика бяху прежде иову во усугубление.
11 услышаша же вси братия его и сестры его вся случившаяся ему, и приидоша к нему, и вси елицы знаху его первее: ядше же и пивше у него, утешиша его и дивишася о всех, яже наведе нань бог: даде же ему кийждо агницу едину и четыре драхмы злата назнаменована.
12 господь же благослови последняя иовля, неже прежняя: бяху же скоти его, овец четыренадесять тысящ, велблюдовъ шесть тысящ, супруг волов тысяща, ослиц стадныхъ тысяща.
13 Родишажеся ему сынове седмь и дщери три:
14 и нарече первую убо день, вторую же кассию, третию же амалфеев рог:
15 и не обретошася подобны в лепоте дщерем иовлевымъ в поднебесней: даде же им отец наследие в братии их.
16 Поживе же иов по язве лет сто седмьдесят, всехъ же лет поживе двести четыредесять осмь. И виде иов сыны своя и сыны сынов своих, даже до четвертаго рода.
17 И скончася иов стар и исполнь дний. Писано же есть паки востати ему, с нимиже господь возставитъ и. Тако толкуется от сирския книги: в земли убо живый авситидийстей, на пределех идумеи и аравии: прежде же бяше имя ему иовав: взем же жену аравляныню, роди сына, емуже имя еннон: бе же той отца убо зарефа, исавовых сынов сын, матере же восорры, якоже быти ему пятому от авраама. И сии царие царствовавшии во едоме, еюже и той обладаше страною: первый валак сын веоров, и имя граду его деннава: по валаце же иовав, нарицаемый иов: по сем ассомъ бывший вождь от феманитидийския страны: по сем адад, сын варадов, иже изсече мадиама на поли моавли, и имя граду его гефем. Пришедшии же к нему друзие, елифаз (сын софань) от сынов исавовых, царь феманийский, валдад (сын амнона ховарскаго) савхейский властитель, софар минейский царь.