Захариа

Главы: 1 2 3 4 5 6 7 8 9 10
11 12 13 14

Глава 1.
1 Во осмый месяц, втораго лета, при дарии, бысть слово господне ко захарии варахиину, сыну аддову, пророку, глаголя:
2 прогневася господь на отцы ваша гневом велиим,
3 и речеши к ним: сице глаголет господь вседержитель: обратитеся ко мне, глаголет господь сил, и обращуся к вам, глаголетъ господь сил.
4 И не будите, якоже отцы ваши, ихже обличаху пророцы прежнии, глаголюще: сице глаголет господь вседержитель: отвратитеся от путий ваших лукавых и от начинаний ваших злых: и не послушаша и не вняша послушати мене, глаголет господь (вседержитель).
5 отцы ваши где суть и пророцы? еда во векъ поживутъ?
6 обаче словеса моя и законы моя приемлете, елика аз заповедаю в дусе моем рабом моим пророком, иже постигнуша отцев ваших. И отвещаша и реша: якоже устави господь вседержитель сотворити нам по путем нашим и по начинанием нашим, тако сотвори нам.
7 В двадесять четвертый первагонадесять месяца, сей есть месяц сават, во второе лето, при дарии, бысть слово господне ко захарии варахиину, сыну аддову, пророку, глаголя:
8 видех нощию, и се, муж всед на коня рыжа, и сей стояше между горами осеняющими, и за ним кони рыжы и сери, и пестри и бели,
9 и рех: что сии, господи? И рече ко мне ангелъ глаголяй во мне: аз покажу ти, что суть сия.
10 И отвеща муж стояй между горами и рече ко мне: сии суть, ихже посла господь обыти землю.
11 И отвещаша ангелу господню стоящему между горами и реша: обыдохом всю землю, и се, вся земля населена есть и молчит.
12 И отвеща ангел господень и рече: господи вседержителю, доколе не имаши помиловати иерусалима и грады иудовы, яже презрел еси, сие седмьдесятое лето?
13 И отвеща господь вседержитель ангелу глаголющему во мне глаголы добры и словеса утешна.
14 И рече ко мне ангел глаголяй во мне: возопий глаголя: сице глаголет господь вседержитель: ревновах по иерусалиму и сиону рвением великим,
15 и гневом велиим аз гневаюся на языки нападающия: зане аз убо прогневахся мало, они же налегоша во злая.
16 Сего ради сице глаголет господь: обращуся ко иерусалиму щедротами, и храм мой созиждется в нем, глаголет господь вседержитель, и мера протягнется во иерусалиме еще.
17 И рече ко мне ангел глаголяй во мне: еще возопий глаголя: сице глаголет господь вседержитель: еще прелиятися имут гради благими, и помилует господь еще сиона и изберет еще иерусалима.
18 И возведох очи мои и видех, и се, четыри рози,
19 и рех ко ангелу глаголющему во мне: что суть сия, господи? И рече ко мне: сии рози расточившии иуду и израиля и иерусалима.
20 И показа ми господь четыри древоделя.
21 И рех: что сии грядут сотворити, (господи)? И рече: сии рози расточившии иуду, и израиля сокрушиша, и никтоже от них воздвиже главы: и изыдоша сии поострити я в руках своих четыри рози, языцы возносящии рогъ на землю господню, еже расточити ю.

Глава 2.
1 И возведох очи мои и видех, и се, муж, и в руце его уже землемерно.
2 И рех к нему: камо грядеши ты? И рече ко мне: размерити иерусалима, еже видети, колика широта его есть и колика долгота.
3 И се, ангел глаголяй во мне стояше, и ин ангелъ исхождаше во сретение ему
4 и рече к нему глаголя: тецы и рцы к юноши оному глаголя: плодовито населится иерусалим от множества человековъ и скотов, иже посреде его:
5 и аз буду ему, глаголет господь, стена огнена окрестъ и в славу буду посреде его.
6 о, о, бежите от земли северныя, глаголет господь, зане от четырех ветров небесных соберу вы, глаголетъ господь:
7 в сион спасайтеся, живущии во дщери вавилонстей.
8 Зане сице глаголет господь вседержитель: вслед славы посла мя на языки пленившия вас, зане касаяйся васъ яко касаяйся в зеницу ока его:
9 зане, се, аз наношу руку мою на ня, и будутъ корысть работающим им, и уразумеете, яко господь вседержитель посла мя.
10 Красуйся и веселися, дщи сионя, зане, се, азъ гряду и вселюся посреде тебе, глаголет господь.
11 И прибегнут языцы мнози ко господу в той день и будут ему в люди и вселятся посреде тебе, и уразумееши, яко господь вседержитель посла мя к тебе.
12 И наследит господь иуду, участие свое на земли святей, и изберет еще иерусалима.
13 Да благоговеет всяка плоть от лица господня, яко воста из облак святых своих.

Глава 3.
1 И показа ми господь иисуса, иереа великаго, стояща пред лицем ангела господня, и диавол стояше одесную его, еже противитися ему.
2 И рече господь ко диаволу: да запретит господь тебе, диаволе, и да запретит господь тебе, избравый иерусалима: не се ли, сие яко главня исторжена из огня?
3 иисус же бе оболчен в ризы гнусны и стояше предъ лицем ангела.
4 И отвеща и рече к стоящим пред лицем его глаголя: отимите ризы гнусныя от него. И рече к нему: се, отях от тебе беззакония твоя и грехи твоя очищу, и облецыте его в подиръ
5 и возложите кидар чист на главу его. И возложиша кидар чист на главу его и облекоша его в ризы. И ангел господень стояше,
6 и засвидетелствоваше ангел господень ко иисусу глаголя:
7 сице глаголет господь вседержитель: аще в путех моих пойдеши и повеления моя сохраниши, и ты разсудиши храм мой: и аще сохраниши двор мой, и дам ти сообращающияся посреде стоящих сих.
8 Послушай убо, иисусе, иерею великий, ты и искреннии твои седящии пред лицем твоим, зане мужие дивозрителие суть: зане, се, аз ввожду раба моего востока:
9 зане камень, егоже дах пред лицем иисусовым, на камени единем седмь очес суть: се, азъ изрыю ров, глаголет господь вседержитель, и осяжу всю обиду земли оныя в день един.
10 В день оный, глаголет господь вседержитель, созовете кийждо искренняго своего под виноград и под смоковницу.

Глава 4.
1 И обратися ангел глаголяй во мне и возведе мя, якоже егда востанет человек от сна своего,
2 и рече ко мне: что ты видиши? И рех: видех, и се, свещник злат весь, и светилце верху его, и седмь светилник верху его, и седмь чашиц светилникомъ верхним его,
3 и две маслины верху его, едина одесную светилца его и едина ошуюю.
4 И вопросих и рех ко ангелу глаголющему во мне глаголя: что суть сия, господи?
5 И отвеща ангел глаголяй во мне и рече ко мне глаголя: не разумееши ли, что суть сия? И рех: ни, господи.
6 И отвеща и рече ко мне глаголя: сие слово господне к зоровавелю глаголя: не в силе велицей, ни в крепости, но в дусе моем, глаголет господь вседержитель.
7 Что ты еси, горо великая, пред лицем зоровавеля, еже исправити? и изнесу камень наследия, равенство благодати, благодать его.
8 И бысть слово господне ко мне глаголя:
9 руце зоровавелевы основаша храм сей и руце его совершат его: и уразумееши, яко господь вседержитель посла мя к вам:
10 зане кто укорил тя есть во дни малы? и возрадуются, и увидят камень, иже от чистаго олова, в руку зоровавеля: седмь сия очеса господня суть, призирающая на всю землю.
11 И отвещах и рех к нему: что суть две маслины сия, яже одесную свещника и ошуюю?
12 И вопросих вторицею и рех к нему: что суть две ветви масличны, яже в руку двух усекалниц златыхъ возливающих и возношающих чашицы златыя?
13 И рече ко мне глаголя: не веси ли, что суть сия? И рех: ни, господи.
14 И рече: сии два сынове тучности, яже предстоятъ господеви всея земли.

Глава 5.
1 И обратихся и возведох очи мои и видех, и се, серп летящь.
2 И рече ко мне: что ты видиши? И рех: аз вижду серп летящь, в долготу лактей двадесять и в широту десяти лактей.
3 И рече ко мне: сия клятва исходящая на лице всея земли: зане всяк тать от сего даже до смерти отмщенъ будет, и всяк кленыйся во лжу от сего до смерти отмстится.
4 И изнесу его, глаголет господь вседержитель, и внидетъ в дом татя и в дом кленущагося именем моим во лжу, и вселится посреде дому его, и скончает его и древа его и камение его.
5 И изыде ангел глаголяй во мне и рече ко мне: воззри очима твоима и виждь исходящее сие. И рех:
6 что есть? И рече: сия мера исходящая. И рече: сия неправда их по всей земли.
7 И се, талант оловян вземляйся, и се, жена едина седяше посреде меры.
8 И рече: сия есть беззаконие. И верже ю в средину меры и вверже камень оловяный во уста ея.
9 И возведох очи мои и видех, и се, две жены исходящия, и дух в крилех их, и те имяху крила, яко криле вдодовы: и взяша меру между землею и между небом.
10 И рех ко ангелу глаголющему во мне: камо сия относятъ меру?
11 И рече ко мне: создати ей храмину в земли вавилонстей и уготовати, и положат ю тамо на уготование свое.

Глава 6.
1 И обратихся и возведох очи мои и видех, и се, четыри колесницы исходящия из средины двоихъ гор, горы же те беша горы медяны:
2 в колеснице первей кони рыжы, и в колеснице вторей кони врани,
3 и в колеснице третией кони бели, и в колеснице четвертей кони пестри скори.
4 И отвещах и рех ко ангелу глаголющему во мне: что суть сия, господи?
5 И отвеща ангел глаголяй во мне и рече: сия суть четыри ветри небеснии, иже исходят предстати господу всея земли.
6 В нейже беху кони врани, исхождаху на землю северскую, и белии исхождаху вслед их, и пестрии исхождаху на землю южную,
7 и скории исхождаху и озираху еже обыти землю. И рече: идите, обыдите землю. И обыдоша землю.
8 И возопи и рече ко мне глаголя: се, исходящии на землю северскую упокоиша ярость мою на земли северстей.
9 И бысть слово господне ко мне глаголя:
10 приими, яже от плена от князей и от ключимыхъ его и от разумевших его, и внидеши ты в день он в дом иосии софониина, грядущаго от вавилона,
11 и приимеши сребро и злато, и сотвориши венцы, и возложиши на главу иисусу иоседекову, иерею великому,
12 и речеши к нему: сице глаголет господь вседержитель: се, муж, восток имя ему, и под ним возсияет, и созиждет храм господень:
13 и той приимет добродетель, и сядет и возобладаетъ на престоле своем, и будет иерей одесную его, и совет мирен будет между обема,
14 а венец будет терпящим и ключимым ему и разумевшимъ его, и в благодать сыну софониину, и в псаломъ во храме господни:
15 и издалеча от сих приидут и созиждут во храме господни, и уразумеете, яко господь вседержитель посла мя к вам: и будет, аще слушающе послушаете гласа господа бога вашего.

Глава 7.
1 И бысть в четвертое лето, при дарии цари, бысть слово господне ко захарии в четвертый месяца девятаго, иже есть хаселев.
2 И посла в вефиль сарасар и арвесеер царь и мужие его молити господа,
3 глаголя ко священником, иже во храме господа (бога) вседержителя, и пророком, глаголя: аще вниде зде в пятый месяц святыня, (плачя или постяся,) якоже сотворих уже многа лета.
4 И бысть слово господа вседержителя ко мне глаголя:
5 рцы ко всем людем земли и ко священником глаголя: аще постистеся или плачевопльствисте в пятинах или седминах (месяца), и се, седмьдесят лет, постом ли постистеся ми?
6 и аще ясте или пиете, не вы ли ясте и пиете?
7 Не сия ли суть словеса, яже глагола господь руками пророковъ прежних, егда бе иерусалим населен и гобзующь, и гради его окрест, и нагорная и подольная населена бяху?
8 И бысть слово господне ко захарии глаголя:
9 сице глаголет господь вседержитель: суд праведен судите и милость и щедроты творите кийждо ко брату своему,
10 а вдовицы и сира, и пришелца и убога не насильствуйте, и злобы кийждо брата своего да не помнит в сердцахъ своих.
11 И не покоришася, еже внимати, и даша плещи презирающия, и ушеса своя отяготиша, еже не слышати,
12 и сердце свое учиниша непокориво, не послушати закона моего и словес, яже посла господь вседержитель духом своим рукою пророков прежних: и бысть гневъ великий от господа вседержителя.
13 И будет, якоже рече, и не услышаша его: сице возопиют, и не имам услышати, глаголет господь вседержитель:
14 и отвергу я во вся языки, иже не разумеша, и земля запустеет последи их от проходящаго и от возвращающагося: и учиниша избранную землю в запустение.

Глава 8.
1 И бысть слово господа вседержителя (ко мне) глаголя:
2 сице глаголет господь вседержитель: ревновах по иерусалиме и сионе рвением великим и яростию велиею ревновахъ по нем.
3 Тако глаголет господь: обращуся к сиону и вселюся посреде иерусалима, и наречется иерусалим град истинный, и гора господа вседержителя гора святая.
4 Сице глаголет господь вседержитель: еще сядут старцы и старицы на путех иерусалимских, кийждо жезл свой имый в руце своей от множества дний:
5 и путие града исполнятся отрочищ и отроковицъ играющих на путех его.
6 Сице глаголет господь вседержитель: аще изнеможет предъ останком людий сих во онех днех, еда и предо мною изнеможетъ? глаголет господь вседержитель.
7 Сице глаголет господь вседержитель: се, аз спасу люди моя от земли восточныя и от земли западныя
8 и введу их (в землю ихъ), и вселюся посреде иерусалима, и будут ми в люди, и аз буду им в бога во истине и в правде.
9 Сице глаголет господь вседержитель: да укрепятся руце вас слышащих во днех сих словеса сия от устъ пророческих, от негоже дне основася храм господа вседержителя, и церковь отнележе создася.
10 Зане прежде дний онех мзда человеком не бе во успех, и мзда скотом не бяше, и исходящему и входящему не бе мира от печали, и послю вся человеки коегождо на искренняго своего.
11 И ныне не по днем онем прежним аз сотворю останку людий сих, глаголет господь вседержитель,
12 но покажу мир: виноград даст плод свой, и земля даст жита своя, и небо даст росу свою, и наследити сотворю останком людий моих сих вся сия.
13 И будет, яко бесте в клятве во языцех, доме иудов и доме израилев, тако спасу вы, и будете в благословении: дерзайте и укрепляйтеся руками вашими.
14 Зане сице глаголет господь вседержитель: якоже помыслихъ озлобити вы, внегда прогневаша мя отцы ваши, глаголетъ господь вседержитель, и не раскаяхся:
15 тако уставих и умыслих во дни сия добро сотворити иерусалиму и дому иудову: дерзайте.
16 Сия словеса, яже сотворите: глаголите истину кийждо искреннему своему, истину и суд мирен судите во вратехъ ваших,
17 и кийждо злобы искренняго своего не помышляйте в сердцахъ ваших, и клятвы лживыя не любите, зане вся сия возненавидех, глаголет господь вседержитель.
18 И бысть слово господа вседержителя ко мне глаголя:
19 сице глаголет господь вседержитель: пост четвертый и постъ пятый, и пост седмый и пост десятый будут дому иудову в радость и в веселие и в праздники благи: и возвеселитеся и истину и мир возлюбите.
20 Сице глаголет господь вседержитель: еще людие мнози приидут и живущии во градех многих:
21 и снидутся живущии во пяти градех во един град, глаголюще: грядим помолитися лицу господню и взыскати лице господа вседержителя: иду и аз.
22 И приидут людие мнози и языцы мнози взыскати лица господа вседержителя во иерусалиме и умолити лице господне.
23 Сице глаголет господь вседержитель: во оны дни имется десять мужей от всех племен языческих, и имутся за ризу мужа иудеанина, глаголюще: пойдем с тобою, зане слышахом, яко бог с вами есть.

Глава 9.
1 Пророчество словесе господня в земли седраха и дамаска жертвы его: зане господь призирает на человеки и на вся колена израилева,
2 и во имафе в пределех его тир и сидон, яко умудреша зело.
3 И созда тир твердыни себе и собра сребро яко персть и злато яко брение путий.
4 Сего ради господь наследит я и поразит в море силу его, и той огнем поястся.
5 увидит аскалон и убоится, и газа и поболитъ зело, и аккарон, яко постыдеся о уповании своем: и погибнет царь от газы, и аскалон не имать населитися.
6 И вселятся иноплеменницы во азоте, и разрушу досаждение иноплеменников,
7 и изму кровь их из уст их и мерзости ихъ из средины зубов их, и оставятся и сии богу нашему и будут яко тысящник во иуде, и аккарон якоже иевусей.
8 И подставлю храму моему воздвижение, еже не сквозе ходити, ниже возвращатися, и ктому не имать приити на ня изгоняяй: яко ныне видех очима моима.
9 Радуйся зело, дщи сионя, проповедуй, дщи иерусалимля: се, царь твой грядет тебе праведн и спасаяй, той кротокъ и всед на подъяремника и жребца юна.
10 И потребит колесницы от ефрема и кони от иерусалима, и потребит лук бранный, и множество, и мир от языков: и обладает водами от моря до моря и от рек до исходищъ земли.
11 И ты в крови завета твоего испустил еси узники твоя от рова не имуща воды.
12 Сядите в тверделех, связани сонмища, и за единъдень пришелствия твоего сугубо воздам ти.
13 Занеже напрягох тя себе, иудо, яко лук, исполнихъ ефрема, и воздвигну чада твоя, сионе, на чада еллинска, и осяжу тя яко мечь ратника.
14 И господь на них явится, и изыдет яко молния стрела его: и господь бог вседержитель в трубу вострубит и пойдет в шуме прещения своего.
15 господь вседержитель защитит их, и поядят я, и посыплютъ их камением пращным, и испиют кровь их яко вино, и исполнят окрины яко жертвенник.
16 И спасет я господь бог их в день он, яко овцы люди своя: зане камение свято валяется на земли его.
17 Аще что благо его, и аще что добро его, пшеница юношам и вино благоуханно девам.

Глава 10.
1 Просите от господа дождя во время ранняго и поздняго: господь сотвори привидения, и дождь зимен даст им, комуждо злак на селе.
2 Зане провещающии глаголаша труды, и вражбителие видения ложна и сония лжива глаголаху, суетными утешаху: сего ради изсхоша яко овцы, и озлоблени быша, понеже не бе изцеления.
3 На пастырей прогневася ярость моя, и на агнцы посещу: и посетит господь бог вседержитель стадо свое, домъ иудин, и учинит я аки коня благолепна своего во брани.
4 И от него призре, и от него учини, и от него лук в дусе ярости, и от него изыдет всяк изгоняяй в том.
5 И будут яко ратницы попирающе брение на путех во брани, и ополчатся, яко господь с ними, и постыдятся всадницы коннии.
6 И укреплю дом иудов и дом иосифов спасу, и вселю я, понеже возлюбих я, и будут аки бы не отвратих их: зане аз господь бог их и услышу я.
7 И будут яко ратницы ефремовы, и возрадуется сердце их аки от вина: и чада их увидят и возвеселятся, и возрадуется сердце их о господе.
8 Возвещу им и прииму я, зане искуплю их, и умножатся, якоже бяху мнози:
9 и всею я в людех, и дальнии помянут мя, и воспитаютъ чада своя, и обратятся:
10 и возвращу я от земли египетския и от ассирианъ прииму я, и в галаадит и в ливан введу я, и не имать остати от них ни един.
11 И пройдут морем узким и поразят в мори волны, и изсякнут вся глубины речныя, и отимется всяко досаждение ассирийско, и скиптр египетск отимется.
12 И укреплю я о где бозе их, и о имени его восхвалятся, глаголет господь.

Глава 11.
1 Разверзи, ливане, двери твоя, и да пояст огнь кедры твоя:
2 да плачевопльствит питис, зане паде кедр, яко вельможи вельми обеднеша. Восплачевопльствите, дуби васанитидстии, яко посечеся дубрава насажденная.
3 Глас плачущих пастырей, яко возбедствова величие их: глас рыкающих львов, яко озлоблено бысть шатание иорданово.
4 Сице глаголет господь вседержитель: пасите овцы заколения,
5 яже стяжавшии закалаху и не раскаявахуся, и продающии я глаголаху: благословен господь, и обогатихомся: и пастырие их не печахуся ни чимже о них.
6 Сего ради не пощажду ктому на живущих на земли, глаголетъ господь: и се, аз предам человеки, коегождо в руце искреннему его и в руце царю своему: и изсекутъ землю, и не имам изъяти от руки их.
7 И упасу овцы заколения в земли ханаани: и прииму себе два жезла, единаго нарекох доброту, а другаго нарекох уже, и упасу овцы.
8 И погублю три пастыри в месяц един, и отягчаетъ душа моя на ня: ибо души их рыкаху на мя.
9 И рех: не имам пасти вас: умирающее да умрет, и изчезающее да изчезнет, и прочая да пояст кийждо плоть ближняго своего.
10 И прииму жезл мой добрый и отвергу его еже разорити завет мой, егоже завещах ко всем людем:
11 и разорится в день оный, и уразумеют хананее овцы хранимыя мне, зане слово господне есть.
12 И реку к ним: аще добро пред вами есть, дадите мзду мою, или отрецытеся. И поставиша мзду мою тридесять сребреник.
13 И рече господь ко мне: вложи я в горнило и смотри, аще искушено есть, имже образом искушен быхъ о них. И приях тридесять сребреник и вложих ихъ в храм господень в горнило.
14 И отвергох жезл вторый уже, еже разорити завет иже посреде иуды и посреде израиля.
15 И рече господь ко мне: еще приими себе сосуды пастырски, пастыря неискусна:
16 зане, се, аз воздвигну пастыря на землю: погибающаго не посетит и расточеннаго не имать взыскати, и сокрушеннаго не имать изцелити и здраваго не имать направити, и мяса избранных пояст и глезны их извиет.
17 о, пасущии суетная и оставльшии овецъ! мечь на мышцу его и на око ему десное: мышца его изсыхающи изсхнет, и око ему десное ослепая ослепнет.

Глава 12.
1 Пророчество словесе господня на израиля, глаголет господь, прострый небо и основаяй землю и созидаяй дух человека в нем:
2 се, аз полагаю иерусалима яко преддверия движимая всем людем окрест, и во иудеи будет обседение на иерусалима:
3 и будет в день оный, положу иерусалима камень попираемый всеми языки: всяк попираяй его ругаяся поругается, и соберутся нань вси языцы земли.
4 В день он, глаголет господь вседержитель, поражу всякаго коня во ужас и всадника его в безумие: и на домъ иудов отверзу очи мои и вся кони людий поражу во ослепление.
5 И рекут тысящницы иудины вси в сердцах своих: обрящемъ себе живущия во иерусалиме о господе вседержители бозе их.
6 В день он положу тысящники иудины яко главню огненну в дровах и яко свещу огненну в стеблии, и поядятъ одесную и ошуюю вся люди окрест: и населится иерусалимъ еще по себе во иерусалиме:
7 и спасет господь селения иудова якоже исперва, яко да не величается похвала дому давидова и величания живущихъ во иерусалиме на иуду.
8 И будет в день он, защитит господь живущих во иерусалиме: и будет немощный в них в той день яко давид, а дом давидов яко дом божий, якоже ангел господень пред ними.
9 И будет в день он, взыщу изъяти вся языки грядущия на иерусалим,
10 и излию на дом давидов и на живущия во иерусалиме дух благодати и щедрот, и воззрят нань, егоже прободоша, и восплачутся о нем плаканием яко о возлюбленнем, и поболят о нем болезнию яко о первенце.
11 В день он возвеличится плачевопльствие во иерусалиме, яко плачевопльствие ададримона на поли магедоне.
12 И восплачется земля по племеном племеном: колено о себе, и жены их о себе: колено дому давидова о себе и жены их о себе:
13 колено дому нафанова о себе, и жены их о себе: колено дому левиина о себе, и жены их и себе: колено симеоне о себе, и жены их о себе:
14 вся прочая колена, колено и колено о себе, и жены их о себе.

Глава 13.
1 В день он будет всяко место отверзаемо дому давидову и живущим во иерусалиме в предвижение и разделение.
2 И будет в день он, глаголет господь саваоф, потреблю имена идолов от земли, и ктому не будет их памяти:и лживыя пророки и духа нечистаго изму от земли.
3 И будет, аще проречет человек еще, и речетъ к нему отец его и мати его, рождшии его, внегда пророчествовати ему: не жив будеши, яко лжу глаголал еси во имя господне: и запнут ему отецъ его и мати его, родившии его, егда пророчествовати начнет.
4 И будет в день он, постыдятся пророцы, кийждо от видения своего, внегда пророчествовати ему, и облекутся в кожу власяную, зане солгаша.
5 И речет: несмь пророк аз, яко человек делаяй землю аз есмь, зане человек роди мя от юности моея.
6 И реку к нему: что язвы сия посреде руку твоею? И речет: имиже уязвлен бых в дому возлюбленнаго моего.
7 Мечу, востани на пастыря моего и на мужа гражданина моего, глаголет господь вседержитель: порази пастыря, и расточатся овцы стада: и наведу руку мою на (малыя) пастыри.
8 И будет в день он на всей земли, глаголет господь, две части ея потребятся и изчезнут, а третия останется на ней:
9 и проведу третию часть сквозе огнь, и разжгу я, якоже разжизается сребро, и искушу я, якоже искушается злато: той призовет имя мое, и аз услышу его и реку: людие мои сии суть. И тии рекут: господь богъ мой.

Глава 14.
1 Се, дние господни грядут, и разделятся корысти твоя в тебе:
2 и соберу вся языки на иерусалим в брань, и пленится град, и расхитятся домове, и жены осквернятся: и изыдет пол града в пленение, а останок людий моихъ не потребятся от града.
3 И изыдет господь и ополчится на языки оны, якоже день ополчения его в день брани.
4 И станут нозе его в день он на горе елеонстей, яже есть прямо иерусалиму на восток: и разделится гора елеонская, пол ея к востоком и пол ея к морю, пропасть велия зело: и уклонится пол горы на север и пол ея на юг:
5 и засыплется дебрь гор моих, и прильпнет дебрь горняя даже до асаила и наполнится, якоже наполнися от лица труса во днех озии царя иудова: и приидет господь бог мой, и вси святии с ним.
6 И будет в день он, не будет свет, но зима и мраз:
7 и будет день един, и день той знаемь будет господеви, и не день и не нощь, и при вечере будет свет.
8 И в день он изыдет вода жива из иерусалима, пол ея в море первое и пол ея в море последнее: и в жатву и в весну будет тако.
9 И будет господь в царя по всей земли: в день он будетъ господь един, и имя его едино,
10 обходя всю землю и пустыню, от гаваи и до реммона, на юг иерусалиму: и вознесется на месте и пребудетъ от врат вениаминих до места врат первых, даже до врат уголных и до столпа анамеиля и до подточилия царева.
11 И вселятся в нем, и анафема не будет ктому, ивселится иерусалим надеяйся.
12 И сие будет падение, имже изсечет господь вся люди, елицы воеваша на иерусалим: истают плоти ихъ стоящих на ногах своих, и очеса им истекут изъ обочий их, и язык их истает во устех их.
13 И будет в день он ужас господень велий на них: и имутся кийждо за руку ближняго своего, и соплетется рука его к руце ближняго своего.
14 И иуда ополчится во иерусалиме и соберет крепость всех людий окрест, злато и сребро и ризы во множество зело.
15 И сие будет падение конем и мском, и велблюдомъ и ослом, и всем скотом сущим в полцех онех, по падению сему.
16 И будет, елицы аще останутся от всех языкъ пришедших на иерусалим, и взыдут на всякое лето покланятися царю господу вседержителю и праздновати праздник скинопигии.
17 И будет, елицы аще не взыдут от всех племенъ земли во иерусалим поклонитися царю господу вседержителю, и сии онем приложатся, не будет на них дождя.
18 Аще же колено египетское не взыдет, ни приидет, и на сих будет язва, еюже поразит господь вся языки, елицы аще не взыдут, еже праздновати праздникъ скинопигии.
19 Сей будет грех египту и грех всем языком, елицы аще не взыдут, еже праздновати праздникъ скинопигии.
20 В день он будет еже во узде коня, свято господу вседержителю: и будут коноби в дому господни яко чаши пред лицем олтаря,
21 и будет всяк коноб во иерусалиме и во иуде святъ господеви вседержителю: и приидут вси жрущии и приимутъ от них и сварят в них, и не будет хананей ктому во храме господа вседержителя в день он.