Малахиа

Главы: 1 2 3 4

Глава 1.
1 Пророчество словесе господня на израиля рукою ангела его: положите убо на сердцах ваших.
2 Возлюбих вы, глаголет господь. И ресте: о чем возлюбилъ еси ны? Не брат ли бе исав иакову? глаголет господь: и возлюбих иакова, исава же возненавидех,
3 и учиних пределы его во изчезновение и достояние его в нырища пустынна.
4 Зане аще речет: идумеа разорися, и обратимся и возсозиждем опустевшая ея: сице глаголет господь вседержитель: тии созиждут, и аз разорю, и нарекутся им пределе беззакония, и людие, на няже ополчися господь до века.
5 И очеса ваша увидят, и вы речете: возвеличися господь превыше предел израилевых.
6 Сын славит отца, и раб господина своего убоится: и аще отец есмь аз, то где слава моя? и аще господь есмь аз, то где есть страх мой? глаголетъ господь вседержитель. Вы священницы презирающии имя мое. И ресте: о чесом презрехом имя твое?
7 Приносяще ко олтареви моему хлебы скверны. И ресте: о чесом осквернихом я? Внегда глаголати вам: трапеза господня осквернена есть: и возложенная брашна уничижили есте.
8 Зане аще приведете слепо на жертву, не зло ли? и аще приведете хромо или недужно, то не зло ли? приведи е князю твоему, еда приимет е? еда приимет лице твое? глаголет господь вседержитель.
9 И ныне умилостивите лице бога вашего и помолитеся ему, (да помилует вы). В руках ваших быша сия, аще прииму от вас лица ваша? глаголет господь вседержитель.
10 Зане и в вас затворятся двери, и не возгнетите огня олтареви моему туне: несть воля моя в вас, глаголет господь вседержитель, и жертвы не прииму от рук ваших.
11 Зане от восток солнца и до запад имя мое прославися во языцех, и на всяцем месте фимиам приносится имени моему и жертва чиста: зане велие имя мое во языцех, глаголет господь вседержитель.
12 Вы же скверните е глаголюще: трапеза господня осквернена есть, и возлагаемая брашна его уничтожена быша.
13 И ресте: сия от злострадания суть. И отдунух я, глаголет господь вседержитель. И внесосте хищения и хромая и недужная, и приведете я на жертву, еда прииму их от рук вашихъ? глаголет господь вседержитель.
14 И проклят, иже бе силен, и бе ему в стаде его мужеск пол, и обет его на нем, и жретъ растленное господеви: зане царь велий аз есмь, глаголетъ господь вседержитель, и имя мое светло во языцех.

Глава 2.
1 И ныне заповедь сия к вам, священницы:
2 аще не услышите и аще не положите на сердцахъ ваших, еже дати славу имени моему, глаголет господь вседержитель, то послю на вы клятву и проклену благословение ваше и оклену е: и разорю благословение ваше, и не будетъ в вас, зане вы не влагаете в сердца ваша.
3 Се, аз отлучу вам рамо, и раскидаю требухи на лица ваша, требухи праздников ваших, и прииму вы вкупе:
4 и уразумеете, яко аз господь послах к вам заповедь сию, еже быти завету моему к левитом, глаголет господь вседержитель.
5 Завет мой бе с ним жизни и мира, и дах ему боязнию боятися мене и от лица имене моего устрашатися ему.
6 Закон истины бе во устех его, и неправда не обретеся во устнах его: в мире исправляяй иде со мною и многи обрати от неправды.
7 Понеже устне иереовы сохранят разум, и закона взыщут от уст его: яко ангел господа вседержителя есть.
8 Вы же уклонистеся от пути и изнемоществисте многихъ в законе, растлисте завет левиин, глаголет господь вседержитель.
9 И аз дах вы уничижены и отвержены во вся языки, зане вы не сохранисте путий моих, но лицъ обинустеся в законе.
10 Не отец ли един всем вамъ? не бог ли единъ созда васъ? что яко остависте кийждо брата своего, осквернити завет отец вашихъ?
11 оставлен бысть иуда, и мерзость бысть во израили и во иерусалиме: зане оскверни иуда святая господня, яже возлюби, и прейде к богом чуждим.
12 Потребит господь человека творящаго сия, дондеже смирится от селений иаковлих и от приносящих жертву господу вседержителю.
13 И сия, яже ненавидех, твористе: покрывасте слезами олтарь господень, и плачем и воздыханием от трудов: еще ли достойно призрети на жертву (вашу), или прияти приятно из рук вашихъ?
14 И ресте: чесо ради? яко господь засвидетелствова между тобою и между женою юности твоея, юже оставил еси, и та общница твоя и жена завета твоего:
15 и не добро ли сотвори, и останок духа его? И ресте: что ино кроме семене ищет богъ? И сохраните духом вашим и жены юности твоея да не оставиши:
16 но аще возненавидев отпустиши ю, глаголет господь богъ израилев, и покрыет нечестие помышления твоя, глаголетъ господь вседержитель: и сохраните духом вашим и не оставите.
17 Прогневляющии бога словесы вашими, и ресте: о чесомъ прогневахом его? Зане ресте: всяк творяй зло добр пред господем, и в них сам благоволи: и где есть бог правды?

Глава 3.
1 Се, аз посылаю ангела моего, и призритъ на путь пред лицем моим: и внезапу приидет в церковь свою господь, егоже вы ищете, и ангел завета, егоже вы хощете: се, грядет, глаголет господь вседержитель.
2 И кто стерпит день пришествия его? и кто постоитъ в видении его? зане той входит яко огнь горнила и яко мыло перущих.
3 И сядет разваряя и очищая яко сребро и яко злато, и очистит сыны левиины, и прелиет я яко злато и яко сребро: и будут господеви приносяще жертву в правде.
4 И угодна будет господеви жертва иудова и иерусалимля, якоже дние века и якоже лета преждняя.
5 И прииду к вам с судом, и буду свидетель скоръ на чародеи и на прелюбодейцы, и на кленущияся именемъ моим во лжу и на лишающия мзды наемника, и на насильствующия вдовиц и пхающия сирыя, и на укланяющия суд пришелца и на небоящияся мене, глаголет господь вседержитель:
6 зане аз господь бог ваш, и не изменяюся, и вы сынове иаковли не удаляетеся от грех отецъ ваших.
7 уклонистеся от законов моих и не сохранисте: обратитеся ко мне, и обращуся к вам, глаголет господь вседержитель. И ресте: в чесом обратимся?
8 Еда обольстит человек бога? зане вы обольщаете мя. И ресте: в чесом обольстихом тя? яко десятины и начатцы с вами суть.
9 И взирающе вы взираете, и мене вы обольщаете.
10 Лето скончася, и внесосте вся плоды в сокровища, и будет расхищение его в дому его: обратитеся убо о сем, глаголет господь вседержитель: аще не отверзу вам хлябий небесных и излию вам благословение мое, дондеже удовлитеся:
11 и разделю вам в брашно, и не имам истлити вамъ плодов земных, и не изнеможет ваш виноград на селе, глаголет господь вседержитель:
12 и ублажат вы вси языцы, зане будете вы земля пожеланная, глаголет господь вседержитель.
13 отяготисте на мя словеса ваша, глаголет господь (вседержитель). И ресте: о чем клеветахом на тя?
14 Ресте: суетен работаяй богу, и что более, яко сохранихом хранения его и яко идохом молитвенницы пред лицем господа вседержителя?
15 и ныне мы блажим чуждих, и созидаются вси творящии беззаконная, сопротивишася богови и спасошася.
16 Сия рекоша боящиися господа, кийждо ко искреннему своему: и внят господь, и услыша, и написа книгу памяти предъ собою боящимся господа и благоговеющим имя его.
17 И будут ми, глаголет господь вседержитель, в день, егоже аз творю в снабдение, и изберу я, имже образомъ избирает человек сына своего (добре) работающа ему.
18 И обратитеся и увидите между праведным и между беззаконным, и между служащим богови и не служащим ему.

Глава 4.
1 Яко се, день грядет горящь яко пещь и попалит я, и будут вси иноплеменницы и вси творящии беззаконная яко стеблие: и возжжет я день господень грядый, глаголет господь вседержитель, и не останется от нихъ корень ниже ветвь.
2 И возсияет вам боящимся имене моего солнце правды и изцеление в крилех его: и изыдете и взыграете, якоже телцы от уз разрешени:
3 и поперете беззаконники, и будут пепел под ногами вашими в день, в оньже аз сотворю, глаголет господь вседержитель.
4 Помяните закон моисеа раба моего, якоже повелехъ ему в хориве ко всему израилю повеления и оправдания.
5 И се, аз послю вам илию фесвитянина, прежде пришествия дне господня великаго и просвещеннаго,
6 иже устроит сердце отца к сыну и сердце человека ко искреннему его, да не пришед поражу землю в конец.